Wir Albreht von Gotes gnaden Pischof ze Pazzowe veriehen offenlich mit disem brief und tun chunt allen den di in sehent oder horent lesen di nu lebent
und her nach chunftig werdent Daz wir wol bedaht mit gunst und willen des Erwirdigen Capitels ze Pazzowe und unsers Gotshaus ze pezzernung
reht und redlich verchoufft haben unsern Marcht ze Haslach und all daz da zu gehort daz dorf ze Holtz ze Prazzer vischwaid vischmad gestifft
und ungestifft gepowen und ungepowen besuht und unbesuht als iz von alter her chomen ist dem Edeln Erwirdigen unserm lieben swager Petern
von Rosenberch obristen Chamerer in Behem und seinen Erben umb Dreuzehen hundert Pazzower pfenning also mit der beschaidenhait daz der
vorbenant unser swager von Rosenberch und sein Erben den selben Marcht und all daz da zu gehort als obgeschriben stet und als er uns an tmaht verchoufft
hat von uns und unserm Gotshaus ze rechtem lehen haben sullen Und haben in in auch ze recht und redlich verlihen nach deutshem lehen reht
Also daz er daz umb uns und unser Gotshaus verdienen sol als ain man seinen lehen herren sol auch also di vest di nu in dem Marcht gepowen stet wir
nider legen sullen und alle Graben ze Haslach in zihen und sleht machen Und sol weder unser swager vorbenant noch sein Erben noch swem si gechouft
sint di wehr mer uf haben noch powen noch dhain and(er) vest vahen noch powen in der Gmarchung di zu Haslach gehorent di er uns nach seinem ayd
ain gezaiget hat an unsers und unsers Nachchomen oder unsers Capitels ab wir Pischofe wern gütlichen willen und gunst Tretz er ab(er) oder sein
Erben dhain vesten oder ander zmant di di lehen an geniezzen oder chomen so sullen si uns ledich worden sein Und an uns und unser Gotshaus ledichlich
geuallen Ez sind auch daz di Gmarchung ob der Hayd untz in di ladmüt und von der ladmüt ob Heisens od(er) eber durch daz veld daz ze naehst an dem wald
leit und furbaz twischen der Posenowe und Eberling untz da selb ob Posenow in den wald und von dann abarthalb sand Oswalt ab Gaukern in den Perch
und dann aben eber untz gen wimmpach an des probst Gmarchung von dem wald und dann aben durch vischwaid und vischpan auf den wazz(er) Gof asants
Lantgericht und Geriht wanschaft und lehenschaft ze Haslach gehorent nicht and(er)s dann in ir alter gwonhait und reht dar in gehat habent Wær auch
daz der vorgenant unser swager von Rosenberch oder sein Erben den vorgeschriben Marcht und all daz da zu gehort verchouffen versetzen od(er) verchumern wolten
So sullen si uns unser Nachchomen oder unser Capitel ab nicht Pischofe wær dar umb vor allen leuten an pieten und wellen wir unser Nachchomen od(er) unser
Capitel daz haben daz sullen si uns gunnen und verchouffen fur all ander leut wellen wir ab(er) daz nicht haben so sullen si iz dhainem man abern ze chouffen
geben noch verchumern dann im gnozen Daz di red also stæt beleib und unzeprochen werd dar uber geben wir disen brief versigelten mit unserm anhangen
den Insigel Der ist geben ze Haslach an dem nachsten eritag nach unser vrowen tag ir gepurt Nach christes gepurt Dreuzehen hundert Jar
dar nach in dem ains und viertzigisten Jar