Wir Burgermeister Schepfen vnd Rete der Grossen der Cleinen vnd der Newen Stete zu Prage Bekennen fur vns alle vnser nachkomen vnd
vor vnsere ganzen gemeyne offenlich mit disem briue allen den die yn sehen oder horen lesen das wir von sunderlichen geheisse wissen vnd willen
des Allerdurchleuchtigisten fursten vnd herren herren Wenczlaws Romischen kunigs zu allen zeiten Merer des Rychs vnd kunigs zu Be
heim vnsers lieben gnedigen herrn doruff das fride vnd gnade in dem lande zu Beheim bestalt werde vnd ouch yederman bey rechte bleibe
vns mit dem hochgebornen fursten vnd herren hrn Jost Marggrauen vnd herren zu Merhern als eime hauptmanne Behemischen ein
Starosta benennet die weil in vnser genediger herre der kunig vor einen hauptman haben wil vnd den Edlen lantherren von Beheim allen vor
bunden vnd voreynet haben vorbinden vnd voreynen vns mit wolbedachtem mute rechter wissen in crafft ditz briues Also das wir In als offte
sich das geburet vnd des not geschiet beygestendig vnd beholffen sein sollen vnd wollen zuschaffen vnsers egenanten herren des kunigs vnd sust
gemeinen nutz fride vnd selikeit in dem lande zu Beheim vnd ouch zubehalden einen yedeman bey seynen rechten gnaden freyheiten vnd
guten gewonheiten der sie von alders gebrawcht haben vnd were es sache das yemand wer der sey sich wider die egenan(ten) vnsern herren den
kunig Marggraff Josten oder die lantherren seczen sie wider recht angreiffen oder sust hindern wolde das sie gemeynen nutz des landes nicht
bestellen mochten so sollen vnd wollen wir In wider dieselben getrewlichen vnd mit aller vnser macht beholffen sein als offte wir des von yn
ermanet werden vnd wann ouch der egenant vnser herre der Romische kunig allen lantherren vnd Stete des kunigrichs zu Beheim die
obgenante stucke zu volfuren vnd mitnamen das recht zusterken vnd fride zubestellen sunderlichen geboten hat dorumb so globen wir in
guten trewen an eydes stat vnd an alles geuerde werdas sich yemand dawider seczen vnd soliche beredung vnd gelubde nicht halden wolde
das wir denne wider dieselben nymandes vsgenomen mit aller vnser macht helffen sullen des zu vrkunt so haben wir egenan(ten) der Grossn
Cleynen vnd der Newen Stete zu Prage vnsere grossere sigele von rechter wissen an disen brieff gehangen der geben ist zu Prage do man
czalte nach Cristi geburte drezcenhundert Jar vnd dar nach In dem vierundnewnczigistem Jare an dem nehsten donerstag vor den heyligen
Phingestagen