Wir Leopold von Gottes gnaden Erwehlter Römischer Kaiser
zu allen Zeiten Mehrer des Reichs in Germanien, zu Hungarn, Böhaimb, Dalmatien, Croatien vnd Sclauonien König, Ertzhertzog zu Osterreich, Marggraff zu
Mähren, Hertzog zu Lützenburg vnd in Schlesien, vnd Marggraff zu Laußnitz, Bekhennen offentlich mit diesem Brieff, vnd thuen khundt Jedermenniglich. Nachdeme
vnß der Würdige, Vnser lieber andächtiger P. Joannes Kastel, deß Collegij Soc: Jesu zu Troppaw Rector, vmb Vnser gnedigste Verwilligung, damit Er von demey von
dem Hochgebornen Vnserm Haimb, fürsten, vnd lieben getrewen, Carlo Eusebio Regierern deß Haußes Lichtenstain, von Niclaspurg, in Schlesien, Hertzogen zu Troppaw vnd
Jägerndorff, zue ainem Gymnasio vnd Collegio alda fundirten, Viertzig Tausendt gulden reinisch, von der Wohlgebornen, Vnserer lieben andächtigen, Barbara Perpe=
tua verwittibten Gräffin von Vrschenbeckh, geborner Horgin, Wederin, Ihr aigen thumbliches in dem Fürstenthumb Troppaw gelegenes guettl Schillersdorff erkauffen
khönne, Vnterthänigst Supplicando angelanget vnd gebetten; Vnd Wir nun auß dem Vns von besagtem P. Rectore producirten, authentischen Instrumento gna=
digst vernommen, Waßmassen die Landt Stände erwehnten Fürstenthumbs Troppaw, hierzue Ihrn Consens freywillig ertheilet haben, wie
nit weniger in Kayser: vnd Königlichen gnaden betrachten, daß hierdurch solchane fundation mehrers Stabiliret, vnd dann vermittels derselben, die Ehr Gottes, vnd deß
incrementum Religionis Catholicæ promovirt werde. Alß haben Wir in den gebettenen khauff vnd Verkhauff ermelten guetts Schillersdorff allergnädigst
consentirt vnd verwilliget: Thuen daß, consentirn, vnd bewilligen solches, alß Regierender König zu Böheimb, vnd Ober Hertzog in Ober: vnd Nieder Schlesien, hie=
mit wissentlich, vnnd in Crafft diß Brieffs, Jedoch also vnd dergestaldt, daß der Jetzige vnnd künfftige P. P. Rectores obgedachten Collegij Soc: JESV zu Troppaw,
Ihren aignen, denen Troppawischen Land Ständen gethanen Euerbiethen gemeeß, nicht allain ainen gewöhnlichen Reuers zu lande abzülegen, sondern auch
alle vnnd Jede onera publica vnnd priuata mit andern den Troppawischen Land Ständen ohnweigerlich zu tragen vnd zu concurrirn schuldig vnnd
verbunden sein sollen. Alles getrewlich vnnd ohn gefehrde. Zue Vrkundt haben Wir diesen Brieff mit Vnserm Kayser: vnd Königlichen anhangenden
größern Jnsigel vestiglichen lassen. Der geben ist in Vnserer Statt Wien, den Dritten, Monatstag Martij, nach CHRISTJ Vnsers lieben Herrn
vnnd Seeligmachers gnadenreichen Geburth, im Sechtzehenhundert, Vier vnnd Siebentzigsten, Vnsers Reichs, deß Römischen im Sechtzehenden,
deß Hungarischen im Neunzehenden, vnnd deß Böheimischen im Achtzehenden Jahr.
Ad mandatum Sac(rae) Cæs(areae)
Regiæq(ue) Maiestatis proprium.
J. H. Tameßin