Wir Blanczflorse frauwe zu falkensteyn und zu bettsteyn dun kunt allen luden die diesen brieff ansehent oder horent lesen daz wir umb unsen schulten nutz urbar und notdorft willen mit furrade und wail bedachtem
muide bie willen und gehenkenisse des erben manes hern Othilns von milberch schultmeisters in deme Dume zu trier unses lieben neven und mompers verkaiffen und verkauffen han eyns rechten werlichen kauffs
eynclichin und ymer me vur uns unse erbin und nakomen den geystlichen erben hern dem comenture und den bruden gemeynclich des ordins der dutscher hern des huise zu trier und yren nakome des selbin huise alle
unse gulde und guit dy wir han oder hauen mogin in deme dorfe zu semmelige und in der genhizde des selbin dorfes uf der spilchin bonen drey gultgin zu wassen ahtin malter rockin funfzihen malter ouey dutsch pont
pennige trirscher werongin eyn steyn isens von rechtis zinsis uz burgin dorffe anderhalb hane zu den gilden als sy steynende sint und dar zu alle daz recht und gerichte eyginschat und erschat grois und cleyne daz wir
in dem dorffe und in der genhizt des selbin dorffs han welicher leige gulde und guit die syn und wie man daz genemen mach nut usz gescheyden it sy an geneste luden schaffe beden manne barme gutte holtz be
wasser weyden wysin veldin ackern buschen weldin nas und druge ho und dyf nyt usz gescheyden isis noch unsin erbin nut dar ane zu behalden wie wir und unse alder die vorgen guit und gulde bis an diesin
hudigin dach mit allem rechte unzherdin und gewendin besessin und des genussin und gebrucht han sunder alleyne so dan guit als mathise von deme cruce burger zu trier da hat dy wir in zueygenge bit syme hern
dye vorgen gulde und guit wir zu lehene han und zu lehene ruimit von dem hogegeborn fursten hern Wenczelao hertzogen zu luccillumburg und zu brabant dy selbe gulde und guit han wir in die vorgen hern den
comenture und in dy bruder gemeynclichin des vorgen ordins und gotzhuise und in hyre nakome des selbin gotzhuise mit halme und mit monde beliuert und bewant bewemdin bewant und uffgedra
gin mit allem rechte uns und unse erbin da ane zu entherbin und die vorgen hern den comenture und die brude des vorgen gotzhuise und hyre nakome des selbin huise da myde zu erbin in alle der bester wisin
und formen daz daz syn kan oder mach sunder alle wyder sprache des selbin gudis und guldin zu genysin zu gebruchin zu haldin zu hebin und zu hant habin eynclichin und geruhclichin na allem yrem nutze urbar und
willen umbe seys hondert cleyne guldin von floren guden goldis und swarin gewichtis dy wir von den vorgen hern gereyt entphangin han und dy un bas in unsin schulten nutz bewant und bekert han sage
wir ee wand diesin brieff geschrin wurde dar umb wir die vorgen hern und nakome des vorgen hyren gotzhuise erffclich und ewcliche beseldere herrin und besitzere des selbin gudis und guldin mit alle rechte
als vurgessrin ist gemacht han und machin und gelobin ouch und han gelobit in guden ewen vur uns unse erbin und nakomen den vorgen hyrn dem comenture den bruden und nakome des vorgen gotzhuise den
egenant guldin und gudis gude gantze ewcliche werschaf als dy und uff zu dime und zu haldin und sullin und gelobin wir hin alle hyndernisse und anspoche die zu dime und usin dime von weme daz were und daz also
ist uns zu kirchen und zu strassin beinch konde und daz man uns enteyne kirchen recht endu und daz man uns unse kirchen haldin in allen gerichten und dar zu wille und willekur wir nutzlich daz die vorgen
hirn yre nakome des selbin huise und ordins der diesin brieff han oder rechte forderonge von yren wegin oder eyn ander von yren wegin wer der sy an alle dase und unse lude gulde gut und pende mogin grifen oder
dun grifen mit gerichte oder ane gerichte in steden dorffen vryheidin oder uf me lande swy und swo sy die pende gulde und guit habin mogin die pende gulde und guit verkoufen versetzin und ver wendin ouch mit gerichte
oder ane gerichte in alle die hant und stat dar hin sy gut und sy sullint und daz also lange also dicke und also vijl bis ane die stont daz hin alle hyndernisse und anspruche ane gedane ist schadin und kusten gentzlichin
nakome sint und daz ane unsin oder ymans andin von unsin wegin geyn hyndernisse oder wieder rede behulffenisse oder beschuttenisse beyder gerichte geystlichis oder wereltlichis und af sy des pendins eynchin schadin oder
kuste lidin die sullin wir hin richtin als wail als daz heubit guit und sullin daz schadin und kuste geloubin yren slechtin wordin ane eyde und verzigin ouch und han verziegen in diesem brieve uf allen schirm behulffenisse
und beschuttenisse beyder gerichte geystlichis und wereltlichis da myde wir hyr wieder kome oder dun mochtin bit vundin die ytzont sint oder mogin werdin nu oder hy na und sunderlich uf daz recht ungesatzt oder gelarde
daz wir sprechin mochtin oder dun sprechin daz wir uber daz halfftheyl rechin werdins bedrogin sin und daz man uns daz recht uber hyr nillen sulle und uf daz wir vurgen mochtin oder dun vurgen daz alle
diese vurgeschrin stucke anders geschrin wern dan sy bereyt wurden und were ouch sache daz diesin vorgen brieff gehicherte gebrochin oder von vuwre durch gessin wurde oder die siegele gebruchit oder von syme
geschege mit gestrite oder ane gestrite wie daz geschege daz en sol diesin vorgen kauff nyt crenkin mogin noch den vorgen hyrn und yre nakome des eyn yre gotzhuise zu schadin noch zu hyndernisse mogin
kumen eynerley hande wijse und wir Othilso von milberch schultmeister zu dem dume zu trier und momper der vorgen unse nychte frauwe Blanczflorse han unsin guden mit willen und gehenkenisse zu allen
diesin vur und nageschrin stuckin punten und artickin gedan und dun in der bester wisin und formen daz daz sin kan oder mach sunder alle wieder sprache und gelobin ouch wir Blanczflorse und Othilso vur g(e)meclich
und unse ieclichz sunderlich in guden ewen mit rechter stedicheit vur uns unse erbin und nakome alle diese vurgeschrine gelobde punte und articke semtclich und yre ieclichz sunderlichin wie sy besebin und vur besebin
sint stede und veste zu haldin und zu vollen furen und dar wyder nyt zu dune noch dun dune oder zu sprechin nu oder hyr na eynder hande wijse heymelich oder offinbar alle argelist schalkeyt und geverde und alle
die vunde die nu sint oder hyr na mogin werdin die uns unse erbin oder nakome zu stadin oder zu fromen und den vorgen hyrn oder yren nakome des ordins der dutscher hyrn und des vorgen yre gotzhuise zu schadin
oder zu hyndernisse mochtin kome usser diesim brieve gescheyden umbe daz wir alle diese vurgeschrin stucke veste und stede haldin und stede sin so han wir blanczflorse und Othilso vurgen unse jngesiegele an diesin brieff
gehangin und umb merre stedicheit han wir gebedin dy ersame hyrn den officiale des houes zu trier daz er des selbin houes siegel und hyr anrich hyrn zu berperch ritter richter der edeler lude des hertzdoms von lutzenbg und dy
derich von falkensteyn son wylne hyr ernstis scheffens zu trier daz sy hyre siegele an diesin brieff zu urkunde willen henkin bit urkunde dieser edeler lude hyr wilhams von manderscheyt hyrn zu nauelstein hyr dyderichs hyr zu esch hyr wil
hams von urley hyr jacobs anstandis scheffen zu trier walrauen von dydenhoue und johan clebesadils von beclinge mane unse hyrn des hertzogen die wir zu gezuge hy zu han gerufen und gebeden und wir offi(cial) des egen houes zu trier
han des selbin houes jngesiegel umb bedin wille der vorgen frauwen blanczflorsen also als uns coment heit daz sy den egen unse houes gesworen swer geleist hat dem wir in diesin sachin und in manin gelobin und wir anrich hyr
zu berpech ritter richter der edeler lude des hertzdoms von lutzil(burg) gen bekenne daz wir unse siegel vur uns und die vorgen unse hyrn man umb bedin wille der edele frauwen frauwe blanczflorse und hyr Othilso und der vorgen unse
hyrn mane han an diesin brieff gehangin des wir wilham von manderscheyt dyderich hyr zu esch wilham von urley jacob anstant walraue von diedenhoue und johan clebesadil man unse hyrn des hertzoge vorgen gebedin han an diesin
zu henkin vur hyn und uns zu urkunde und ich dyderich von falkensteyn bekenne daz ich myn siegel umb bedin wille myn frauwe frauwe blanczflorse vur sy und hyr Othilso zu urkunde han an diesin brieff gehangin Gegeben di
man zalte na cristus geburte dusint druhundert und sehsich jair up den heyligen oster abent
~ge. con. hem~