Ich Stephan von Hohenberch ver gich vnd tůn chunt allen den di nu sint vnd her nach chvnftich wden
di disen prief hoern od(er) sehnt lesn. daz ich hon ainen tzehnt von dem erbn herren ept heinrich vnd d(em)
Gotzhauz ze Goetweich zwischn hohinbach vnd haerweld ze rehtem pürchreht. vnd hat in dez pürchreht v(er)sezzn
von dem halbn tzehnt. des han ich mich gůtlich mit im d(er)slosn. also. daz ich all iar von dem selbn tzehnt sol
raichn an sand Bartholomee tag ze rehtem pürchreht hýntz sand veit tzwaý pfunt wienn(er) pfenning
vnd swa ich daz niht taet mich en irrt dann ehaft not so sol ich mein reht habn vlorn an dem selbn
tzehnt. vnd ist auch dem vorgenantem Gotzhauz wordn ledich. an all wid(er)red. Daz dise sache stät belib
leb an alln chriech. han ich dem vorgenantem Gotzhauz ze Goetweich ge gebn disen p(ri)ef besiglt mit
minem infigel vnd sint des tzaug. h(er) haerwach p(re)u(n)st ze haerweld. h(er) philipp chust(er) da selb. h(er)
fridich pfarr(er) ze sand pantell. Jacob pfarr(er) ze haerweld. h(er) marchart heusler von nvlengtein.
sin prud(er) h(er) otto. h(er) wolfinch heusl(er). h(er) otto von weizznb(er)ch. sin brud(er) Goerg. andre von haerweld.
chr(ist)an hvntpach. sin prud(er) lewtein. vnd and(er) frum lewt. Diser p(ri)ef ist gebn ze Goetweich da
von ch(ri)stes gepurt warn dreutzehn hund(er)t iar. in dem dritten iar. an des hailign chreutz tag in dem
herbst.