Ich Chvnrat von Chovnring obrist schench in Osterreich ver gich vnd tvn chvnt Alln den di nv
sint vnd her nach chvnftich werdnt di disen prief horent oder sehnt lesn Daz ich mein vogtei
di ich han vber den hof ze Hvlbrvnn von dem erbarn Gotshavs ze Gotweich han en pfolhen dem
erbarn ritter hern Vlrich von Hvlbrvnn mit sotan beschaidenhait daz er avf dem selbn hof niht
sol haben noch hovstewr noch nahtseld noch dehain svchvng denn daz er mir vnd dem selbn Gots
havs dar an dienen sol vnd mer aver daz daz er dem vorgenantn Gotshavs ze Gotweich vnd mir
niht en fvge an der selbn vogtei Also daz er mich dar an beswert daz ich sei an in vordert vnd er
des wider wer daz er vns di niht wider geantwrt so aver allez daz ledich dez der selb her Vlrich
von Hvlbrvnn von mir hat ze lehn in dem land ze Osterreich Dar vber so git er disn prief
sam insigel mit samt mit minem insigel ze einem vrchvnd Diser prief ist gebn ze Gumpstan
do von christes gepvrt warn drevzehn hvndert iar in den ahtem iar An dem phinztag