Ich Mathias hern Rapotz svn von Vruar vergich an disem prief vnd tvon chvnt allen den die disen prief sehent oder horent lesen
daz mein prueder Gotfrid vnd Lavrentz den Weinzehent an dem pfaffenperg halben den vnser vater her Rapot gehabt hat mir
verchauft habent dem hohen vnd dem erweren herren Apt Petren von Chotweig vnd seiner samnvng vm sex vnd fvnfzech
march silbers vnd ist der chauf geschehen mit meinem willen vnd pin avch ich der selben sechs vnd fvnfzech march silbers ge
wert vnd dar vm han ich gesatzt dem vorgenanten herren vnd der samnvng ze Chotweig ze rechtem scherin fver all anspruch
vm den vorgenanten zehent mein prveder Gotfriden Lavrentzen Jansen zesamt mir vnverschaidenleich swaz jn an vnser ainem abge
daz schvllen sev haben avf dem andern vnd avf alle dev vnd wir haben vnd swaz dem vorgenanten herren Apt Petren vnd der
samnvng ze Chotweig mit chost oder mit taiding avf den vorgenanten zehent gieng daz schvll wir in ab legen daz die red stæt
peleib an allen chriech gib ich Mathias disen prief vnd mein prveder Gotfrid Lavrentz Jans ver sigelten mit vnsern Jnsigeln ze
einem vrchvnd den vorgenanten herren hintz Chotweig mit den erweren gezevgen der nam hie geschriben stet. her Chvnrat der Dvrst
der Gozz Chvnrat der Rot. hertweich her Oedel von Havtaren. der Ekprecht fridreich Pvezschel. her hainreich der Regenspvrger her
hainreich pei dem vreithof vnd sein prveder her Andre dar nach des erweren Gotzhaus levt von Chotweig her Jacob der schreiber her
Chvnrat der hverenpech her levtwein der chamrer Albrecht der richter von palt Chvnrat der schaffer. wisent von Prvnn vnd sein
prveder Ot. der hestnicher Engelschalch vnd ander erwer levt den die red chvnt ist. Der prief ist geben ze stain do von
Christes gepvort ergangen waren drevzehen hvndert jar dar nach in dem zwelftem jar an sand Giligen tach ...