Ich hainreich von haselawe vergich vnd tvn chvnt allen den die disen prief lesent oder horent lesen die nv lebent
vnd hernach chvnftich sint daz ich mit meiner erben gutem willen vnd gvnst vnd mit verdachtem mvte zv der
zeitt do ich iz wol getvn mochte gelazzen han den herren von dem chotweich den zehenten ze Eysenpach den mein
vater vnd ich inne gehabt haben also daz ich von dem hevtigen tage da mit niht ze schaffen sol haben danne als vil
daz ich meinen rechten zehenten alle jar da von sol geben nach des landes recht ze ostereich Daz dise rede vnd dise
sache furbaz staet vnd vnzebrochen beleibe dar vmb so gib ich in disen prief zv ainem offen vrchvnde vnd zv ainem
waren gezeuge vnd zv ainer ewigen vestnunge diser sache versigelten mit meinem Jnsigil vnd mit hern seifrides
Jnsigil von chranichperch vnd mit hern weichardes Jnsigil von Topel die diser sache gezevg sint mit ir Jnsigiln
vnd sint avch des gezevg her otte von zelkinge her Niclas von wildvngesmavr her herman von svnnenberch
vnd ander frvme levte genvg den dise sache wol chvnt ist diser prief ist geben ze wienne do von christes geburt
waren ergangen drevtzehen hvndert jar Jn dem sechzehenten jare dar nach an sand cholmans tage .