Ich Chunrat von Werd. vnd Jch Vlrich von Pergaw. Wir vergehen vnd tuen chund. alle den die disen prief an
sehent oder lesen horent. die nv lebent vnd her nach chunftig sind. Daz der Erber Herr Apt
Marchhart mit guetem willen vnd mit gemainem rat sein samnung vnser vrawn Gotzhaws
ze Chotwaig durch vnsers dinst willen vnd auch sunder mivntschaft hat gelihen den Hof
ze Hedreinsrat vnd waz dar zue gehort ze veld vnd ze dorff der des Gotzhaws ze Chotwaig
rehtes aygen ist. Vnserm dien(er) Dietm(ar) dem Slevnezer vnd sein Hausvrawn vnd ir paider Erben
ze rehtem purchreht nach landes sit vnd gewonhait in Osterreich also mit beschaidenhait daz er
alle iar dem Gotzhaws ze Chotwaig an sand Martins tag dienen schol ein halp pfunt wienn(er)
pfenning gemain(er) munizz ze rehtem purchreht nach landes sit vnd gewonhait von dem vorgenan
tem Hof oder wer den Hof nach im in nvtz vnd gewer hat. Vnd wann er den dinst saumt
an dem vorgenanten tag so get wandel dar auf nach purchreht reht vnd gewonhait in dem
land. Er schol auch allen seinen frvm da mit schaffen vnd sein Hausvraw vnd ir Erben mit v(er)chawffen
mit seczen vnd schol daz geschehen mit dez Erbn H(er)ren Apt Marchharts hant vnd mit seinem
willen oder wer dez Gotzhaws H(er)r ist oder wer sein Amptman ist dem sev iz enphelhent. der
schol auch dez Hofs mit ganczem reht an dez Gotzhaws stat stifter vnd stoczer sein also purchrehtes
reht vnd gewonhait ist. Dar vber ze ainem vrchund vnd westerigung diser sach gen er Dietm(ar)
der vorgenant dem Erbn H(er)ren Apt Marcharten vnd der samung dez Gotzhaws ze dem Chotwaig
disen prief versigelten vnd westerigenten mit vnser paider Insigeln mein Chunrats von Werd vnd mein
Vlrichs von Pergaw. wan er aigens selb niht Insigels hat. Der sind zevch H(er)r Ott von Celling H(er)r
Vlrich sein svn Ott von Prezzenw(a)ld Jorg sein prueder Ruedolf P(re)tl Ott Chlingf(r)ied vnd ander
Erber leut den dev red chund ist. Der prief ist gegeben da von Christ(es) gepurd ergangen waren
Tausent Iar drev Hundert Iar dar nach in dem sibenczehentem Iar An dem Hofvart tag
vns(er)s H(er)ren ze Wienn in der stat