Ich Wulfing der luefnichen von prunn vergieh und tuen chunt allen den di disen prief sehent lesent
oder lesen horent di nu sind oder her nach chunftich werdent daz ich und mein hausvrau vrau Dyemuet
und all unser erben haben ainen hof datz prunn ze purchrecht des sind dre lehen von dem erbern
herren Apt Otten und seinem gotshaus ze choetwaeg do von wier dienten alle iar sehs schaf voysfuter
an di tuenau fur den selben dienst hab wier dem vorgenanten erbern herren Apt Otten und seinem gots
haus ze choetwaeg gegeben ze widerweihsel ledichlaich an all anspraeche zder zeit do wier iz wol getuen mochten
unsers vrien aigen ainen hof datz guter redel do von man furbaz ewichlaich sol dienen dem egenanten gots
haus ze choetwaeg alle iar ainen mutt choern ainen mutt habern zwelif groz ches zwo gemast gens sehs
huenner und sechtzig aier und di selben gult schull wier im schirm als man vrieiz aigen schirm sol nach recht
und gewonhait des landes ze osterreich und sol daz daz vorgenant gotshaus ze choetwaeg und swer hat und
Apt do ist haben auf allem dem guet daz wier haben in dem land ze osterreich wier schullen auch ich
wulfing und mein hausvrau vrau Dyemuet und unser erben di vorgenanten von dem vorgenanten hof datz prunn
nicht mer dienen denn alle iar an sand gerten tag ain pfunt gemainer wienner pfenning hintz choetwaeg
wier schullen auch den selben hof haben zu ainem vrieien purchrecht zdem dienst als vor geschriben ist wan
wier unser vrieiz aigen dar umb haben gegeben wier schullen auch den hof inn haben an alle stuer an all
steur an all losung und an allen andern umbgelt wie der genant sei wier mugen auch mit dem hof allen unsern
frum schaffen in verchouffen in ssetzen oder geben wem wier wellen als mit unserm vrieien purchrecht und
sol daz geschehen mit des willen und hant der herr und Apt ist ze choetwaeg als purchrechtes recht und gewonhait
ist in dem land ze osterreich und wann wier nimer sein so sol der vorgenant hof datz prunn mit allem und
gantzem recht als vor geschriben ist an ober unser nest und pesten erben di schullen in danne inne haben mit allem
dem recht und wier in innt haben gehabet und daz aber zu ainem stetaigen urchund diser sach gib ich wulfing
der vorgenant dem erbern herren Apt Otten und seinem gotshaus ze choetwaeg disen prief versigelt mit meinem
insigel und mit der erbern herren insigel hern jansen von chunring hern chrystan des chusaeer hern ul
reichs des waser mans purchart und hern hartwaeges des lochler di der sach gezeug sind auch sind des gezeug
her chuonrat von tyernstain her otto von wezzenberch her peter von palo her ulreich der wolfereuter und
ander erber leut genueg den di sach wol chunt ist der prief ist gegeben und daz ist geschehen do von chrystes
puert warn ergangen dreutzehenhundert iar dar nach in dem vier und zwaintzigisten iar an sand michela tag
datz choetwaeg