Ich Chadolt von der Altenburch vergieh offenleich an disem prief daz ich mit wol verdachtem mvt
vnd mit meins pruder Hainreichs vnd aller meiner Erben gvnst vnd gvtleichem willen
verchauft han dem Erbern herren Apt Otten von dem Chotweich zv vnser frawen Gotshavs
auf der Celle in Haspach meins rechten tegens fvnf vnd fivrzik pfenning gvlt auf
gestiften holden daz da haizzet datz den Sachslvtzern vmb vier pfvnt wienner pfenning
der ich recht vnd redleich gewert pin allen iren frvmen damit zeschaffen als mit anderm
irem aigen also daz ich noch mein Erben fvrbaz weder fogtey noch dehain Recht auf
demselben gvt nicht haben vnd setze avch mich vnd alle mein Erben schirm vnd gewer
fvr alle Ansprach nach landes Recht ze Osterreich vnd als aigens Recht ist des vorgenan
ten gvtes daz ich in recht vnd redleich verchauft han Vnd darvber zv ein vrchvnd gib
ich in disen offen Brief versigelten mit meim Insigel des sind avch getzevg di Erbn her
ren her Dietreich vnd her Stephan von Hohenberch mit iren Insigeln der prief ist
geben nach Christ gepvrt drevzehen hvndert Iar in dem drev vnd dreizkistem Iar
darnach an dem avffart tag