Ich Chunrat hern Vlreichs des Wolfenreuter sun von Ovrstal dem got genad Margret mein hausvraw vnd alle vnser Er
ben Vnd ich Hainreich von Erwing des vorgenanten hern Vlreichs aydem Alhaid mein hausvraw vnd alle vnser Erben
Vnd ich Wolfhart der Zirvogel auch des vorgenanten hern Vlreichs aydem Katrei mein hausvraw vnd alle vnser Erben Wi
veriehen offenlich an disem prief vnd tvn chvnt allen den di in sehent oder horent lesen di nv sint oder hernach chvnftich wer
dent daz wir alle gemaenchleich mit wol verdachtem mvet nach rat vnser pesten frevnt gvnst vnd gvtleichem willen al
ler vnser Erben Verchavffet haben recht vnd redleich ze der zeit do wir ez wol getvn mochten Vnsern Hof datz Ovrstal mit
aller der vnd darzv gehort zeveld vnd zv dorf versvcht vnd vnversvcht gestift vnd vngestift swie daz genant ist als er vns an
gevallen ist mit des oftgenanten hern Vlreichs tod des Wolfenrevter dem got genad vnd als er in vnd auch wir in nvtz vnd in
rechter pvrchrechts gewer her pracht haben von dem Gotshaus ze Chotwig daz di aegenschaft an gehort Den haben wir ver
chavft vnserm rechtem pvrch herren dem erbern vnserm genedigem herren apt Wulfingen ze den zeiten apt auf dem Chot
wig vnd auch seiner erbern sammvng vnd dem Gotshaus vmbe hvndert phvnt vnd vmbe sibentzik phvnt gemaener Wien
ner phenneng der wir recht vnd redleich gewert sein Vnd schvllen avch wir vnd alle vnser Erben des selben hofs datz Ovrstal
vnd alles des daz darzv gehort als wr geschriben stet vnd vnsers rechten daz wir dar an gehabt haben des vorgenanten vnsers
herren apt Wulfings vnd seiner sammvng vnd seins Gotshaus ze Chotwig recht scherm vnd gewer sein fvr alle ansprach
als man pvrchrecht ze recht schermen schol vnd des landes recht ist ze Osterreich Wer aber daz in darvber dehain chrieg
oder schad da von mit eim rechten avf gestvnd den schvllen wir in ablegan an alle widerred wan daz haben wir in gelobt
mit vnsern trewen geschech aber des nicht swer danne des landes herre ist ze Osterreich oder der daz lant ze den zei
ten an des fvrsten stat inne hat der schol vnsers gvtes daz wir vnd vnser Erben haben oder noch gewinnen in dem
land ze Osterreich dem oft genanten vnsm herren apt Wulfingen oder der ze den zeiten herre vnd apt ist auf dem
Chotwig vnd der sammvng als vil in geantewvrten mit vnserm gvtleichem willen vnd schvllen sev daz inne haben
in nvtz vnd in gewer als lang vntz daz si alles ires schadens da von bechoment der in da von auf gestanden ist Vnd daz
der chavf vnd avch di wandlvng von vns vnd von vnsern Erben stet vnd vntzeprochen behalten werd geben wir dem
egenanten vnserm herren apt Wulfingen von dem Chotwig vnd seiner sammvng disen offen prief versigelten
ich Chvnrat der Wolfenrevter Vnd ich Hainrich von Erwing vnd ich Wolfhart der Zirvogel mit vnseren
hangvnden Infigelen zv eim waren vrchvnde diser sache Vnd ist der prief gegeben do man zalt von Christes
gepvit drevtzehen hvndert Iar in dem fvnf vnd dreizkistem Iar dar nach an sand Cholmans tag ze Chot
weig avf dem perge