Ich Albreht Schench von Lvdingsdorf ze Oeten(b)urch vn(d) tun chunt allen den di disen
Briv sehent oder horent lesen daz ich mit wol verdachtem mut nach Rat vn(d) gunst miner frevnt
ze einer ebigen gehugenu(ss) vn(d) ge einem selgerat mir vn(d) miner seligen Havsfrowe Elspete
der Got gnade zder zit do ichs wol getun mocht Geshaffet vn(d) gegebe(n) han mein wis ze Wal
din ledichlichen vn(d) vngetailet hintz sand Nyclas dem pharr(er) vn(d) der chirchen da selbe hal
ber vn(d) den Gaistlichen h(er)ren minorn brud(er)n ze Oeten(b)urch den andern halben tayl vn(d) ist daz geschehe(n)
mit so getaner beschaidenhait daz der pharr(er) ze Oeten(b)urch in der pharr chirchen da mein Havsfrowe
bestat ist vn(d) minor bruder ze ir(e)m chloster alle iar mine vn(d) miner Havsfrowe iartag begen
sullen des abentes mit der Vigilij vn(d) des morgens mit der selmesse als gewonlich vn(d) sitelich
ist daz daz also stet sei dar uber gib ich disen priv ze eine(r) vrkunn mit mine(m) insigel d(er) ist
geben ze Oeten(b)urch nach ch(r)istes Geburd uber drevzehen hund(er)t Iar dar nach in dem Sechs vn(d)
Dreyzzigsten iar an sand Dorotheen tag