Ich Albreht von Ror vnd vraw Chunigunt mein hawsfraw vnd Alle vnser erben veriehen vnd tůn chunt an disem offen prief
allen den die in sehent horent oder lesent die da nu sint oder hernach chünftich werdent Daz vns vnser genedig(er) h(er)re Apt
wlfinch von dem Chotweich vnd die samnunge da selbes die genad getůn habent daz si vns daz halbe lehen daz her derfivd
daz wain des Gundramar gewesen ist gelihen habent ze rechtem purkrecht Also daz wir od(er) swer daz selbe lehen pesitzet
dem vorgenantem Gothaus ze Chotweich dienen schullen alle iar an sand merteins tag ze recheem purckrecht vier vnd
zwaynczich wienner pfennig vnd nicht mer Vnd wer daz daz wir daz nicht entleten oder swer daz halbe lehen inne hiet
ze dem tag als vor geschriben stet so schol fůrpas wandel dar auf gen Als auf andern lůgen die da vmb gelegen sint
vnd die ein auch angehorent Auch schulle wir allen vnser frům schaffen mit dem egenantem halben lehen mit verchavfen mit
versaczen vnd geben swem wir wellen mit des vorgenanten gothaus hant Vnd daz daz stet vnd vnczeprochen peleibe dar
vber gib ich Albreht von Ror vñ mein hawsfraw vraw Chunigunt vnd vns(er) paider erben vnsem genedigen h(er)ren Apt wlfinch
von dem Chotweich vnd der samnung darselbes disen offen prief versigelten mit meinem anhangunden insigel ze ainer
vrchund der rechten warhait Ditz ist geschehen vnd ist der prief geben ze wiennen in der stat Nach christes geburt
dreivzehenhundert iar vnd dar nach in dem syben vnd dreyssigistem iar des suntages vor mitter vasten