Ich Stephan d(er) Watenstain(er) v(er)gich vnd tůn chunt allen den die disen p(ri)ef sehent lesent od(er) hozent lesen di nv
sint od(er) her nach chunftich w(er)dent Daz ich mit b(e)dahtem muet vnd mit guetem willen mein(er) muet(er) frow(e)n
Diemuten vnd mein(er) hausvrawn frow(e)n Agnesen vnd meins Ochems Gotfrits vnd aller mein(er) erbn han ze
chauffen geben dem Erbn h(er)ren abpt Wulfing datz dem Chotwig ze den zeit(e)n einen vb(er)dienst auf dem
lehn daz gelegen ist datz p(r)unn(e) des zenndorf(er) lehn daz dient an sand Gilgen tag viertzich metzzen
hab(e)n alt(er) polting(er) mazz vnd an sand Michels tag viertze(n)thalben pfennich gemaen(er) wienn(er) mv(n)zz vnd ze
weinaht(e)n ain fued(er) holtz vnd ze faschang ain huen vnd han im daz gegeben vmb aht pfunt pfenning
wienn(er) mv(n)zz der ich gantz vnd gar gew(er)t pin vnd han im vnd dem Gotshaus datz Chotwig den vor ge
nant(e)n dienst gegeben mit allem dem recht vnd mit allem dem nvtz vnd ich in vnd mein vod(er)n gehabt
haben vnd schol des sein vnd des Gotshaus gew(er) vnd schirm sein nach landes sit vnd gewonhait in Ost(er)rich
Vnd daz dev red stet beleib vnd vntzebrochen gib ich dem vorgenant(e)n h(er)ren vnd dem Gotshaus disen p(ri)ef
ze ainem vrchund v(er)sigelt mit mein(e)m Insigel vnd h(er)n peters Insigel von spatz Die sind gezevg h(er)r
Hadmar von wolfsperg Iorg mein geswei von chvrling Seyfrid d(er) slierbech Chv(n)rat d(er) Hornpech
vnd and(er) Erb(er) leut genuch den dev red vnd dev sach chunt ist Der p(ri)ef ist geb(e)n do von christes
gepurt ergange(n) warn dreutzehenhundert Iar dar nach im Növn vnd dreizzigste(n) Iar an sand
vincenten tag : - : - : - : - : - : -