Ich Aykla der preyberger von Haindek vnd mein hausvrow vrow Dyemot vnd vnser Erben
Wier veriehen an disem offen brief vnd tůn chunt Allen den die in sehent hoerent oder lesent
Daz wir mit verdachtem mvt vnd mit gůtem willen vnd mit gvnst vnd hant aller vnser
Erben die wir nů haben oder noch gewinenn schullen vnd mit vnser frevnte rât redleychen an
recht vnd vnversprochenleych verchauft vnd auf geben haben fůr rehtez Aygen zway Gvt
auf dem zierem gelegen da dâ selbens Aykla vnd Jans auf gesezzen wâren levt vnd gvt
stokch vnd stâin wazzer holz vnd veldyn Acher vnd wismad Hovs vnd hofstat gepowen
vnd vngepowen gesůcht vnd vngesůcht mit allen den nůtzen vnd rehten die dâr zû ge
hoerent als wir sew emâlen in nůtz vnd in gewer inne gehabt haben dem erben manne
Hansen von Wldach pvrger ze sand pœt vnd seiner wirtinn vrowen Catteryn vnd ir
paider Erben svnen vnd toechten vmb Sechs vnd fumfczich phvnt d(er) gvt(en) phening
der wir von in gâr vnd ganczlich gericht vnd gewert sein vnd sullen in die vorgenanten
Gvt fůr rehtez Aygen ze freyen vnd ze schirmen vor aller chlag vnd Ansprvch nâch
des Landes reht tæten wier des nicht Welhen schaden sew des nêmen den ir ains pey
seinen trewen mocht gesagen ân allez geuerde den schullen wier in ab legen gâr vnd gancz
leich an allen chrieg vnd an alle chosting vnd schullen daz hab daz vns vnd daz
vnser aigen vnd auf vnsern Erben vnd auf alls dem waz wir haben daz das stæte vnd
vnversprochen beleybe dâr vber gib ich in disen offen brief mit mein Anhangendem Insigel
Zů ainem vrchvnde der wârhaitt der brief ist geben nâch chrystes gebůrd drevzehen
hundert Jâr dâr nâch in dem viergechistem Jâre des nehsten svntages vor der
Liechtmisse : -