Ich Marchart der Heutler fraw Anna mein hausfraw vnd vnser erben Veriechen offenleich an disem prief vnd tuen chunt allen den di in sechent
oder hörent lesen di nu sind vnd hernach chunftig werdent Daz wier vnd auch vnser holden tze Aerbenslag einen chrieg gehabt haben mit
dem Erbern geistlichen herren Abbt Wulfingen vnd seiner samenung des Gotshaus tze Chotweyg vmb ein Wayd vnd vmb ein holtz daz do
hayzet der Ponperig vnd gehört tzu der öden Dorffstat tze Pondorf Der wier vnd di selben vnser holden tze Aerbenslag iähen tzu einem
Purchrecht von dem Gotshaus des selben vns der vorgenant herre von Chotweyg vnd sein samenung nicht gestaten noch gunnen wolten wo
von daz wier noch vnser holden weder prief noch chainer lay vrchund der vber heten des wier getzeugen möchten mit einem rechten Den selben
chrieg habent erber Leut vnd vnser pesten freunt ab genomen vnd gericht Also daz wier aller vnser ansprach vnd als vnsers rechten daz wir
vnd vnser holden tze Aerbenslag an der vorgenanten wayd haben scholten geswigen sein hinder des oftvgenanten herren Abbt Wulfing vnd
Daz er vnd sein samenung von Chotweyg mit der selben wayd vnd auch mit dem holtz als vor geschriben stet tuet gegen vns vnd gegen
vnsern holden tze Aerbenslag waz sein genad waer vnd waz er wolt Dor vmb hat er vnd sein samenung vns her wider begenadt durch
trew vnd durch sunder freuntschaft Daz er vns di selben wayd vnd auch daz holtz vnd waz des ist do der chrieg vmb gewesen ist Vns vnd
vnserm holden tze Aerbenslag bestatigt vnd verschriben hat mit des vorgenanten seines Gotshaus vnd seiner samenung prief Wier vorge
nanten Marcharten vnd frawen Annen meiner hausfrawen tzu vnsern taegen vnd di weil wier payde leben Ledigchleich an allen dienst tze
haben mit solicher beschaydenhait Daz furbaz wier vnd vnser erben vnd auch vnser holden tze Aerbenslag vnd all vnser nach chömen chain
ansprach noch chain recht dor an nicht haben schullen Vnd daz di wayd vnd auch daz holtz vnd swaz dor tzue gehoert do der chrieg vmb gewe
sen ist des Gotshaus tze Chotweyg aigen sind vnd do mit tuen mugen als mit anderm ierem aigen waz seu wellent Vnd swaz wir
wandlung hieten hin fuer mit versetzen mit verchäuffen wier oder vnser erben Oder wer vnser guet tze Aerbenslag inne hiet Wie
wal wier lebten oder nach vnserm toed des schol daz Gotshaus tze Chotweyg an seinem rechten als hie geschriben stet vnentgolten sein
Vnd des selben sein wier schirm vnd gewer als Landes recht ist tze Osterreich Waer aber daz dem Gotshaus dor vber chain chrieg oder
chain ansprach auf gestuend swaz seu des schaden naemen mit einem rechten den schulle wier in ablegen Vnd schullen seu daz haben auf
alle den vnd wier vnser erben habn in dem Land tze Osterreich Vnd daz auch daz selb dem offtgenanten Gotshaus tze Chotweyg von mier
vorgenanten Marcharten vnd von meiner hausfrawen frawen Annen vnd von allen vnsern erben vnd auch von den holden tze Aerbenslag
vnd swer daz guet tze Aerbenslag inne hiet staet vnd vntzebrochen belab heben wier in disen offen prief geinsigelten mit meinem Insi
gel tzue einer waeren bestatigung vnd mit meiner prueder Insigeln hern fridreichs vnd hern Otten tzu einem getzeug Dor tzue
sind auch der sache getzeug mit iren Insigeln di erbern herren her Weichhart von Topel tzu den tzeiten Lantschter in Osterreich
her fridreich von Atzenprukke her Chuonrat von Eyerndorf tzu den tzeiten Purchgraf tze Lospach her Ott von Wildekk her
fridreich der flaysch di der red gedinget gewesen sind Vnd ander pider leut genueg den die sache wol chunt vnd gewizzen ist
Der prief ist gegeben do von Christes gepuerd waeren ergangen Dreutzehen hundert Iar Dor nach in dem aintz vnd Vierzg
isten Iar an sand Iohans tag tze Suniwentten