Wir Wl(ri)ch von Gotz gnaden . Probst ze Waldhaus . vnd ich Vlrich Tevsent mit sampt dem Couent da selb alle ge
main . Iehen vnd tůn chund offenleich an disem prief . Allen den di in sehent oder horent lesen Daz vns Růger
der hantneyder . zu den zeiten Purg(er) ze Ens . vnd vns(er)m gotzhauz . ze Waldhaus . gegebn vnd ge schafft hat . zwen
Weingarten . di do haizzent in dem Gvtern . vnd an der Purgleiten . di an dem Retsperg gelegn ist vnd dar zu
ain phunt geltz . zu rechtem Purgrecht auf seinem hauz daz Ens . daz zenochst fridreichs dez phister(er)s hauz .
gelegen ist . di man vns auch alle iar an sand Gorgen tag raichen schol . Wir schullen vns auch der vrgenanten
Weingarten . vnd dez vrgenante(n) phunt geltz vnderwinden . mit allem dem recht . vnd mit allen den nvtzen
vnd er sei inne gehabt hat . vnd schullen wir auch alle iar Iarleich da von raich(en) raichen seinem sun Iansen .
der sich durch got . zu vns in vns(er)n orden ergebn hat . zu ein(er) pezzung sein(er) phrvnt . vnd sein(er) pvech(er) . vnd auch
sein(er) gewant(er) . wir oder w(er) nach vns Probst wirt . zway phunt phennig . all iar iarleich . vntz an seinen tod
Geschaech auch im ichtz not zu den zwain phunten . da well wir in vaterleich vnd gnadichleich an gedenchen .
durch seinez vat(er) willen . wann er iz gantz vns(er)n trewn gesatzt hat . Vnd wann daz ist . daz er stwibt . So schull(en)
wir . oder w(er) dann Probst ist . von den vrgenanten weingarten . vnd von dem phunt geltz auf dem hauz .
den a(n)t(er)n vns(er)s Couentz raichen . zwai phunt wienn(er) phennig . alle iar Iarleich dar vmb si ewichleich begen
schulln sein vnd sein(er) hauzfrawn . vnd aller irer Erbn Iartag . mit vigili . vnd mit sel mezz . als in vns(er)m
Gotzhauz gewonhait ist . W(er) aw(er) daz . daz di vrgenanten Růgn erbn wolten daz vrgenante phunt geltz von
vns chaufen . daz er vns . auf dem offegena(n)ten hauz gegebn hat . So schulln si vns gebn zehen phunt . alter
wiener phennig . oder sw(er) dann Probst ist . da schull wir vmb chaufen ein ander phunt geltz . wo vns daz
geuellet . vnd ist daz vrgenante hauz . dann ledichleich der erben . W(er) aw(er) daz . daz wir . od(er) w(er) nach vns Probst
wirt . seinem vrgenante(n) sun Iansen vns(er)m Průder . di zwai phunt phennig als vor geschribn stet . nicht raich
ten . oder ob an dem Iartag saumig w(er)n . So schulln sich di erbn an dem hauz vnd an den zwen weingarten
|an daz eruellet wirt| . so schulln vns di erbn di weingarten . vnd daz phunt geltz . wider in antwurten .
an allen chrig . Vnd daz . daz vngbrochen beleib . allenthalben . dez geb wir Probst vnd di gmain dez
Couentz ze Waldhausen disen prif sigelt mit vns(er)n anhangunden Insigel . zu ein(er)n off(e)n vrchund
d(er) warhait Der prif ist auch ge gebn . do man zalt von xp(ist)i gepurd . dreuzehnhundert Iar .
vnd dar nach in dem dreu vnd vierczigisten Iar an sand Mauricij tag .