Ich Wernhart von Ecelse vnd fraw Helen mein haussfraw vnd all vnser Erben Vnd ich katreÿ di Hagerinn der vorgenanten
frawn Helen Swester. Veriehen an disem prief vnd tuen chunt allen den di in sehent oder hörent lesen di nu lebent
vnd her nach chunftig werdent. Daz wir mit woluerdahtem muet nach vnser pesten freunt Rat vnd tzu der
zeit do wir ez wol getün mahten Vnsern hof datz Nider Rædel der vnser rehtez aÿgen gewesen ist mit alle den
vnd dor tzů gehört tze ueld vnd tze dörffe. gestift vnd vngestift. versuecht vnd vnversuecht. swie daz genant ist
Verchauft haben reht vnd redleich Dem Erbern geÿstleichen herren. Abpt Wulfingen. tze chötweig vnd seiner Samnu
nung vmb. Sibentzigk. pfunt pfennig. wiener gemainer müntz der wir gar vnd gentzleich gewert sein. daz
si allen ieren frumen do mit schaffen mugen als in aller pest fuegt. versetzen vnd verchäuffen. vnd geben swem si
wellent an allen ierrung Wir setzen auch vns ich vorgenanter Wernhart vnd mein haussfraw fraw Helen
vnd all vnser Erben vnd ich Götfrid der Goldekker für di vorgenanten Junchfrawn frawn katreyn vnuer
schaidenleich wan si tzu den tzeiten vnuogtper was. des vorgenanten hofs vnd swaz dor tzue gehört als
vorgeschriben stet schirm vnd gwer für all ansprach. als aÿgens vnd Landes reht ist ze Osterreich
Vnd swaz in dor an ab get. daz schullen si haben auf vns vnd auf alle den vnd wir haben in dem Land
tze Osterreich. Vnd dor vber tzu einer sicherhait vnd auch tzu einer bestætigung geben wir in disen offen
prief ich vorgenanter Wernhart von Ecelse mit meinem Insigel. Vnd ich egenanter Götfrid der
Goldekker mit meinem Insigel. der tzů sind auch getzeug mit ieren Ansigen. her cholman von Ram
senpach. her Dietmar der Ræ. chünrat von freuntshausen. pei der wandlung sind auch gewesen
her Hainreich der hewfler. her fridreich der vleÿschäcz. Růger der pÿchäher. Hertel von Diendorf. vnd
ander Erber leut genůg den di sache wol chunt ist Vnd ist der prief gegeben do man tzalt von
Christes gepürd Dreytzehen hundert iar dor nach in dem Drein vnd viertzkisten iar an Sand thomans
tag vor Weÿchnächten