Wir Wulffinch von gotes genaden Abt vnser vrowen dez gotzhawses ze Chotweych Vnd die Samenunge da selbes Veriehen vnd tun
chunt allen den die disen prief sehent lesent oder horent lesen die nu lebent vnd hernach chvmftich werdent Daz Herwort
vnser zehentener datz mulbach vnd Ruger der Strodel von Veltz sein aydem gechawffet habent ain lehen ze Veltz von chvnraten
dem Pöhemreuter vnd von seinen erben mit alle dem vnd dar zv gehort vnd daz ir rechtes aygen gewesen ist vnd die selben
aygenschaſt habent sew gechawffet vnserm gotzhaws ze Chotweich vnd habent an gesehen die lieb vnd die trew die sew zv dem
gotzhaws habent vnd habent ez her wider enphangen von dem gotzhaws vnd habent awch auf daz vorgenant lehen viertzich
pfenning purchrechtes geleit die man dem gotzhaws alle iar raychen schol an sand Georigen tag vnd nicht mer man
schol awch die vorgenanten viertzich pfenning purchrechtes raychen hintz dem Wölfflein wer dez gotzhaws amman do ist vnd nicht
anderswa Wir schullen awch hintz dem egenanten lehen dhain vordrung nicht haben weder mit stewer noch mit nachstewr
noch mit motn noch mit dehainer laye vordrung denn swenn sew oder ir erben die vorgenanten viertzich pfenning vnserm aman
geraychent an sand Georigen tag so haben wir hintz dem vorgenanten lehen dez iares nicht mer ze sprechen Wær aber daz der
vorgenant Herwort oder der genant Ruger oder ir payder erben daz vorgenant ^3w^ wider verchawffen wolden ez wær
mit einander oder ze ainzigen theiln oder swie in aller peste fueget dez schullen wir ^3w^ nicht irren vnd schullen sew nur dar
zv fuedern swo sew vnser dar zv bedurffen Ez schol awch die wandlung vnd daz verchawffen geschehen mit vnsers vorgenanten
ammannes hant von dem Veltzlein dar vmb daz die aygenschaſt pey dem gotzhaws beleib vnd awch daz vnsers purchrechtes icht
nimmer werde daz sew durch irer trewn willen dar auf geleit habent Wir schullen sew awch nicht nötten daz sew mit ir selber
leiben dar auff sitzzen vnd vnser holden sein dem swen sew dar in setzent oder wie sew ez nutzent dez schullen wir in wol
gvnnen Wær aber daz sew daz vorgenant lehen verchawffen wolden mit einander so schullen sew vns von im allen geben
zwen pfenning ze ablayt vnd zwen ze anlayt Wær aber daz sew ez ze ainzigen verchawffen wolden so schol man ie von der
hewschot geben ainen pfenning ze ablayt vnd ainen ze anlayt vnd von der hofmarch ainen pfenning ze ablayt vnd
ainen ze anlayt vnd schol awch die aygenschaſt beleiben pey dem gotzhaws daz wir sei nicht verwandln schullen weder mit
verchawffen noch mit verwechseln noch mit dehainer lay wandlung Wir schullen awch daz vorgenant lehen mit aller trewn
in vnserm schirm haben als ander dez gotzhaws aygen wand sew ez durch irer trewn willen hinder daz gotzhaws gechawffet
habent Vnd dar vber daz dise sach vnd alles daz vorgeschriben stet furder ewichleichen stat vnd vntzebrochen beleibe geben
wir vorgenanter Wulffinch disen prief versigelten mit vnserm anfigel Vnd awch bestatigten mit der vorgenanten
Samenunge anfigel Daz ist geschehen vnd der prief ist geben nach Christes gepurt drewzehen hundrt Iar dar
nach in dem fvnf vnd viertzigisten Iar dez sunntages ze plvmöstern do man singet Domine ne longe facias :