Ich Hainreich der Heussler von Oeserndorf, fraw Elspet mein haussfraw, vnd all vnser erben veriehen offenleich
an disem prief vnd tuen chunt allen den di in sehent lesent oder horent lesen di nu lebent oder her nach chu
nftig werdent Daz wir mit gesamter hant vnd gunst aller vnser erben vnd auch mit gunst meins
aidems Jansen von Liechtenek vnd seiner haussfrawn Agnesen vnd nach rat vnserr pesten freunt zu der zeit
do wier ez wol getuen machten recht vnd redleich verchauft haben vnsers rechten freyen aigens ain pfunt
gelts daz gelegen ist in dem forst auf dem hof ze charelsperch vnder planchenstain Daz selb pfunt gelts
als wier ez in nutz vnd in gwer her pracht haben versuecht vnd vnversuecht gestift vnd vngestift swie
daz genant ist haben wier verchauft den erbern gaistleichen herren abpt Wulfingen vnd seiner samenug
ze chotweig in ier oblay di sunderleich der chauf an gehort vmb viertzehen pfunt gemainer wiemer
pfennig mit leichauf vnd mit allen sachen der vns di selben herren auz ierr oblay gantz vnd gar gewt
habent Vnd des selben dienstes schol man in raichen ain halbz pfunt ze pfingsten vnd ain halbz pfunt
an sand michelo tag mit neiwen pfennig Des vorgenanten pfunt gelts vnd alles des dar zu ge
hort als vor geschriben stet setz wier vns vnd all vnser erben schirm vnd gwer fur all ansprach
als aigens recht vnd landes gwonhait ist ze Osterreich Si mugen auch mit dem egenanten
pfunt gelts vnd mit alle den vnd dar zu gehort als vor geschriben ist allen ieren frumen schaffen
mit versetzen mit verchaufen als in aller pest fuegt Vnd swaz in dar an ab get mit ainem rech
ten daz schullen si haben auf allen dem gut vnd wier haben oder gewinnen in dem land ze Osterreich
Vnd daz der chauf vnd auch di wandlung furbaz ewichleich stet vnd vntzebrochen beleib ge
ben wier dem egenanten herren abpt Wulfingen vnd seiner samenung ze chotweig disen
offen prief versigelten mit mein vorgenants hainreichs des heussler Insigel vnd mit meins
aidems Insigel Jansen von Liechtenek Dar zu ist der sache gezeug mit seinem Insigel
Wulfinch der heussler mein pruder vnd ander erber leut genueg den di sache wol chunt ist
Der prief ist geben do man zalt von christi gepuerd dreuzchen hundert iar da nach in
dem sechs vnd viertzigsten iar an dem swartzen sunntag in der vasten