Ad perpetuam rei memoriam. Sane pro parte dilectorum filiorum prioris et fratrum domus sancti Iohannis Baptiste in Nova Civitate Pragensi ordinis fratrum beate Marie de monte Carmeli nobis nuper exhibita petitio continebat, quod olim felicis recordationis Iohannes papa XXII predecessor noster, attendens quod in civitate Pragensi, in qua tunc temporis nullus locus dicti ordinis existebat, ad divini cultus augmentum et animarum salutem expediebat, quod in ea locus aliquis pro fratribus dicti ordinis construeretur, de fratrum suorum consilio et apostolice potestatis plenitudine statuit et ordinavit, quod in dicta civitate Pragensi locus aliquis pro fratribus dicti ordinis, in quo ecclesiam, cimiterium, domos et alia necessaria pro eorum habitatione construere et edificare possent, de novo fundari et construi posset, et quod fratres dicti ordinis locum huiusmodi recipere et in eo perpetuo commorari valerent, constitutione felicis recordationis Bonifatii pape VIII predecessoris nostri, qua cavetur, ne fratres mendicantes loca de novo recipere presumant absque sedis apostolice licentia speciali, et aliis constitutionibus apostolicis contrariis nequaquam obstantibus, prout in litteris apostolicis inde confectis plenius dicitur contineri. Cum autem, sicut eadem petitio subiungebat, postmodum in dicta civitate Pragensi locus pro fratribus dicti ordinis fundatus et constructus fuerit, et in eo ecclesia, cimiterium, domus et alia necessaria pro eorum habitatione edificata existant, ipsique prior et fratres in eo a longis retro temporibus pacifice commorati fuerint et commorentur de presenti, pro parte ipsorum prioris et fratrum nobis fuit humiliter supplicatum, ut fundationi, constructioni et edificationi loci huiusmodi ac receptioni eiusdem per fratres dicti ordinis factis, necnon commorationi eorum in eodem loco robur apostolice confirmationis adicere de benignitate apostolica dignaremur. Nos igitur, de premissis certam notitiam non habentes, huiusmodi supplicationibus inclinati, fraternitati tue per apostolica scripta mandamus, quatinus, si per diligentem inquisitionem per te desuper faciendam premissa veritate niti reppereris, fundationem, constructionem et edificationem loci huiusmodi ac receptionem eiusdem per fratres dicti ordinis factas, necnon commorationem eorum in eodem loco, et quecumque inde secuta, auctoritate apostolica confirmes et approbes, defectus, si qui forsan intervenerint in eisdem, supplendo de gratia speciali, constitutionibus apostolicis et aliis contrariis non obstantibus quibuscumque. Datum Avinione, II nonas iulii, pontificatus nostri anno nono.