In gotes namen Amen Ich Wenzel Szeifilmeyster burger zu prage der grozzen stat #3w offenbar vnd tun chunt
mit disem brieff allen den die in sehen oder horen lesen daz ich mit wolbedachtem mute vnd mit rathe meiner
lewt gescheft tun von allen meinen gutern die mir got verlihen hat in disem zceitlichen leben daz nach meinem
tod daz nach meim tode kain krieg dar vmb werde czwischen meinen nachkomen vnd schaffe in aller weis
als hernach geschribn stet czum ersten mache ich meiner gescheffte volzieher vnd vormunde der chind meiner lie
ben ewirtinne vnd meiner chindt die erbn manne Niclas polczer vnd den erbn herrn des apoteken cramers sun
burger zu prage meine lieben sweger daz sie meiner ewirtinne vnd meiner chinden also raten vnd mein
geschefte also volfuren als ich in das an allen zweifel sunderlichen wol getrawe vnd gelaube Darnach be
kenne ich daz ich habe eingenomen vnd enpfangen czweyhundert schok grosser pfennige von herren andr
hes gelde des brewczars vbir der prucken die selben czweyhundert schok grosser pfennige sten vff alle mei
nem gute vnd sal da von tun als in einem gescheftbrieff da daruber gemacht ist clarlich begriffen ist dar
nach schicke ich vnd schaffe meiner tochter Agnesen vnd iren chinden funffczik schok grosser da mit sal
sie von meinen chinden vnd gutern geteilt sein vnd was daruber bleibt alles mein gut es sei rurnde oder
vnrurnde wie daz mit sunderlichen worten mage benant werden daz schaffe ich allczumal teile vnd gebe
der Anna meiner lieben ewirtinne vnd meinen chindern vnd der Cunia meiner swester einan also vil als
dem andern zu gleichem teyle vnder sie tzu teilen Auch wil ich daz die egenant Cunia mein swester in mei
nem hause bei meinen chindern beleiben sulle die weile sie lebet furbas schicke ich vnd wil daz man alle die
schuld die ich schuldig beleibe die wizzenlich sey vnd die man beweisen muge von allen meinen gutn beczaln
sulle des czu einem geczeugnisse haben die weisen manne herren Coklaw richter Niclas vom Newnhaus
vnd Jacob ortel gesworne burger vnd scheppfen der obgenanten stat zu prage ire sigele durch meiner pet
zen bete willen an disen brieff gehangen der geben ist zu prage doman zalte nach cristi gepurt drey
tzehnhundert Jar vnd darnach in dem Achtczigisten Jare an sente Margreten der heiligen Junchfrawen