Wir Abt Johannes vnd der Conuent gmain ze Pawmgartenp(er)g pekennen offenleich mit dem prief
vnd tůn chund allen den di in sehent od(er) lesen horent daz wir mit beraintem rat vnd mit gůtem
willen der erwirdigen vnd edeln Frawn Frawn Angnesen H(er)n Růdolfs von walse di czeit lant=
marschalch in ost(er)reich gemahel lautterleich durch got nach der grossen pegir vnd vleizzigem
pet so si vns an gelegt hat ganczew vnd vollew průdschaft nach vns(er)s grabs ordens gwonhait
geben haben vnd machen sey auch tailheftig aller der gůtet di in vns(er)m orden vnd pesunderleich
in vns(er)m chlost(er) geschiht mit messen lesen mit allmuesen geben mit vasten mit wachen mit
petten vnd wann daz ist daz si mit dem tod ab get vnd daz wir mit dem gegenburtigen prief
gemant werden so schullen wir ir pegrebnisse pegen nach der gwonhait vns(er)s ordens vnd schul=
len schreiben irn namen in vns(er) totenpůch daz ir Jartag Jerleich mit and(er)n vns(er)n průd(er)n pegangen
werd dez cze vrkchund geben wir ir den offen prief vsigelten mit vns(er)n paiden anhangunden In
sigeln der prief ist geben nach Christi gepurd drewczehenhund(er)t Jar darnach in dem Sechs
vnd achczigistem Jar dez mantag in den acht tagen vnserr Frawn zed(er) drist czeit