Wir Burgermaister vnd Alle Drey Räthe sambt der Ganzen Gemain der Statt Brünn Jezigen vnd Künftigen:
Bekennen vnd thuen kündt offentlich mit disem gegenwertigen brieff, vor allen denen, die Jhn sehen, horen, oder lesen werden, Daß wir mit verainigtem Rath, wissen vnd willen vnser
allersemmentlichen, Vmb vnserer Gemainer Statt Notturfft, im Nahmen aines rechten widerkauffs, recht vnd redlich verkaufft haben, vnd in krafft dieses gegenwertigen briefes hiemit
verkauffen, auß allen vnnd Jedlichen gemelter Vnserer Statt Ränden, Zinsen, Nüzen, Einkommen, vnnd Geföllen, drey Hundert Gulden Reinisches oder Geltz, Zu Jährlichen kauffen gewiß=
nes, aines rechten wahren Jährlichen Zinses, nemblich dem Fürstlichen Hospital in der Statt Nicolspurg Zu S: Johann genandt, Vnd dann Zu deroselben gehaimen Cänzley, dem Hochwürdigisten
dürchleüchtigen vnd Hochgebornen Fürsten vnd Herren, Herren Francisco der H: Römischen Kirchen deß Tituls S: Maria trans Tyberim Cardinali vnd Fürsten von Dietrichstain,
Bischoffen zü Ollmüz, Fürsten, der Röm: Cayserlichen Cäppellen, Graffen, Röm: Kay: Matt: gehaimben Rathe, vnnd deroselben Königreiche vnd Erblanden Protectori, Wie auch deß Marggraff=
thumbs Mähren Völlmächtigen Gubernatori vnnd Commissario Generali, als Fundatori, vnnd Stüfftern, Nach solchem abgang aber Hochgedachtes Jhrer Hochfürstlichen Gnaden, deroselben
Erben vnnd Nachkhommern Herrn Zu Nicolspurg, so lang diese der Wahren Catholischen Religion Zugethan sein werden; (Läßt Jhn aber Gott was gnediglich Verhoffen) die fragendt würdigen
all, Hochernandten Jhr Hoch Fürst: Gnaden Successorn vnnd Nachkhomblichen Bischoffen Zu Ollmüz, nachmals auch den Herrn Burgermaistern vnnd Rath der Statt Nicolspurg Jezigen
vnd künftigen, so lang sie, wie oben gemeldt in Catholischen glauben, vmb ain Summa, Fünff Tausent Gulden Reinisch Gelt, auch Zu Sechzig kreüzer rechnendt, an güter landts gebreügiger
Münz, So wir allberait von Jnen ganz Völlig, ohne abgang im baarem geldt Zu vnsern händen gänzlich empfangen; Welchen Zins wir also aus vnd Vnd all, Vnsern Nachkhommern, geloben vnd ver=
sprechen, bey Vnsern guetten treüen, glauben vnd wahren Wortten, obgenandten vnsern Cäuffern vnnd dero gehaimen Cänzley, Jezigen vnnd künftigen, auff Zway Vnderschiedliche Termin, aines Jeden
Jahrs, auff künftige Jährliche fristen, am tag Georgij, das im Tausent Sechs Hundert Fünff vnd Zwainzigisten Jahr anfahendt, ainen halben thail, Nemblich, Ain Hundert Vnd Fünffzig Gulden
Reinisch, Vnd am tag Wenceslai baldt hernach Volgendt, den andern halben thail, gleicherweiß, wie obvermeldt, Ain Hundert Vnd Fünffzig Gulden, vnnd also immerfort, an güetter in diesem
Marggraffthumb Mähren, ingemein ganghaffter Münze, ohn alle gefahr, Vngeldt, räncke, vnnd entrichten; Vnnd haben derowegen vns für Zu güetter Sicherheit, vnnd Zu ainem rechten Vnderpfandt,
denn vngeschaidt, (Wie obengemeldet, besetzt, verpfandt, vnnd Verlegt, anfangs gemelte Statt, alle vnnd Jede Ränden, Nüzungen, einkhommen vnnd gefällen, so wir Jetzundt haben, oder
nach ins künftigen Zeiten Vberkhommen möchten, durch das gehalt vnnd Mainung, das ein thail dem andern, den Cäufflichen ewigen Zinsen die Haubt Summa, auff Zukündigen, vnschädlich seyn,
oder Zu außlösen, khaines wegs, einhichig macht noch gewaldt haben solle, sondern dieselbe Zu vns verkauffen, vnnd vnsern Nachkhommern auff ewige Zeit Völliglich vnd Vnwiderrufflich
Verbleiben, alle gefahrde vnnd argelist, hierinn gänzlich außgeschlossen, vnnd außgeschaiden, Daß sofern wir, oder an vnsern bezahlung des Jährlichen Zinses (so Gott bewahre) säumig
Würden, vnd denselben auff ein oder andern Termin, nicht entrichten, also da mehr gedachte vnser Cäuffer, sambt allen Jren Nachkhommern, das getreülich handt reüchig, vnnd khünftigen, solle, vnnd mögen
auch ganz Völlkhomene macht, erlaubnuß, füeg, vnd recht haben, vns Vorkhauffern, vnnd all vnsern nachkhommendt Räthe, vnd Bürger, Arm vnnd Reiche, sambt vnsern Haab vnd Güettern,
auff strassen, in Stätten, Märckhten, vnnd Dörffern, auß aller Hafft vnnd enden, Wo wir im landt Zubetretten, vnnd Zübekhommen sein werden, aigenndt gewaldt, oder durch gerichtszwang,
ohne Vnderschaidt des auffhalten, Cümmern, khümmern, Pfenden, vnd thuen, so lang Vnd, bis lang, bis das dieser Vorkhauffte güet vnser Nachkhommer, diesem allem Wege hiemit vnnd hierin
Verfaßt vnnd geschrieben, ein Völlig vnd haubt Geniegen, sambt allen hierunder ergangenen schaden vnnd Vncosten gethan werden, Vnnd ob dieser Vnser Brieff Vberleüffig, Haarlocher, Mäulmakel
Nachtruckh, oder andern Mangel gewünne vnnd hette, woran das sein möchte, das alles soll Jnen khain schaden Züfüegen noch bringen; Sondern so offt sie das begehren, thun vnnd wöllen wir
Jnen solchen Brieff Vernewen, als Völlmächtig thuen, das alles ohn all hindernuß, vnd allengefährde. Zu Vrkundt vnd grösserer Sicherheit haben wir obgenandter Bürger=
maister vnnd alle Drey Räth der Statt Brünn, Vnsers grössers Jnsigel, an disem Brieff außgetruckht hangen lassen; Geben Zu Brünn am tag Wenceslai. Nach Christi
Vnsers lieben Herren vnnd Saeligmachers Gebürth, Jm ain Tausent Sechs Hundert Vier Vnd Zwainzigisten Jahr.
Wir Burgermaister vndt Ratz der Stadt Nicol= (L.S.) spurg bekhennen hiemit, das wies gegenwertige Abschrift
mit dem waaren Original fleissig collationieren lassen, vndt selbiges von wortt Zu wortt gleichlautendt befunden; Zu des sen Vrkundt
haben Wir Vnser claines Sigill hierfür stellen lassen. Actum Nicolspurg den 9. martij Ao 1639.