IN NOMINE
SSMI D. N. D. LEONIS DIVINA PROVIDENTIA PAPAE XIII
LUDOVICUS PIAVI
MISERATIONE DIVINA ET APOSTOLICAE SEDIS GRATIA
PATRIARCHA HIEROSOLYMITANUS
Magnus Ordinis S. Sepulcri Magister, etc., etc., etc.
Ex gestorum monumentis habemus gloriosissimos Carolum Magnum Imperatorem, Ludovicum VI, Philippum Sapientem, S. Ludovicum IX, Philippum Hispan. Regem aliosque magnanimos Duces et Principes catholicæ fidei
zelatores ac strenuissimos defensores, fortissimos diversis temporibus Equites sub quibusdam regulis instituisse ad hunc finem ut S. Hierosolymorum Urbem et Resurgentis Domini Sepulcrum contra Infidelium aggressus defendere
atque custodire curarent. Sed tunc præcipue strenuorum hujusmodi militum emicuit dignitas, cum inter Christianorum Principum adversus infideles demandatas expeditiones, præclarus Dux Godefridus Bullionius, copioso
cruce-signatorum militum, auspicante Urbano II Pontif. Max., exercitu comparato, innumeram hostium multitudinem, Deo favente, devicit : unde, Hierosolyma capta, ipse unanimi voto, Hierosolymorum Rex solemniter fuit
proclamatus. Atque ut gloriosum Christi Salvatoris Sepulcrum rite custodiretur, nobilissimos viros ejusdem S. Sepulcri milites ex tunc instituisse traditum est, rubeis crucibus in scuto argenteo sculptis, insignitos ; quorum postea
piissimus Balduinus summum moderatorem ac magistrum Hierosolymitan. Patriarcham statuisse perhibetur. Verum, capta iterum, proh dolor! Hierosolyma, et Pastore una cum grege exsulare coacto, iterum facta est vidua
Domina gentium, et Ordo ipse S. Sepulcri labescere visus est ; donec ad ejusdem memoriam instaurandam Summi Pontifices Alexander VI aliique usque ad Benedictum XIV animum applicuerunt ; atque ad augendam fidelium
erga Sepulcrum Domini religionem, eorumque animos ad pietatem erga SS. Loca vehementius excitandos, generalibus Ordinis Statutis renovatis, concesserunt ut quamdiu Patriarcha ipse a sua Sede abesse cogeretur,
S. Sepulcri Equites a Guardiano Montis Sion et totius Seraphicæ Franciscalium in Terra Sancta familiæ Custode creari atque institui valerent. Verum Patriarchali Hierosolymorum Ecclesia restituto Pastore, decretum
est ut ad Patriarcham ipsum, prout antiquitus, hujusmodi Equitum S. Sepulcri creatio atque institutio Apostolica concessione iterum deferretur. Postea vero SSinus D. N. Pius Papa IX, Patriarchatu hujus Ecclesiæ jam
ab anno MDCCCXLVII instaurato, ad augendam Equestris hujus Ordinis dignitatem atque ut, Christianorum studia ad defendendam et promovendam in Locis Terræ Sanctæ catholicam Religionem, eorum meritis debito
honoris præmio cohonestatis, incenderentur, per litteras Apostolicas « Cum Multa » in forma Brevis datas sub die XXIV Januarii anni MDCCCLXVIII generalibus ejusdem Ordinis statutis renovatis, triplicem Equitum classem,
determinatis cuique insignibus et vestium forma, in posterum distinguendam, Apostolica auctoritate sancivit. Nos igitur quos, licet immeritos, ad Patriarchalis hujus Ecclesiæ regimen Divinæ gratiæ munus evexit, cum te
dilectissimum in Christo Revmum Dnum Carolum Landsteiner, Canonicum ad hon. Metropolitanæ Viennen., Prælatum
infulatum Nikolsburgen., Brunensis, etc. etc., tum præstantia dignitate illustrem, tum catholicæ fidei zelo ac religione erga Sanctissima
hæc nostra Redemptionis Monumenta, nec non de Sancta Christi Ecclesia per præclara fidei et pietatis opera benemeritum legitimo testimonio et pruden-
ti tua moderatione actualis Austriaci Imperii peregrinationis ad Loca Sancta noverimus, meritis tuis et operibus digna præmia conferre æquum existimavimus.
Quapropter nomine et auctoritate Apostolicæ Sedis te Ordinis S. Sepulcri Commendatorem elegimus, nominavimus, creavimus et instituimus ; tibi insignia Ordinis pro tuo gradu de more solemniter conferentes,
atque per præsentes litteras ita a Nobis nominatum, institutum atque insignitum declaramus ; cum facultate ipsius militiæ vestes atque insignia pro tuo gradu deferendi, auream scilicet crucem encausto sanguinei coloris
illitam, quæ quatuor alias minores cruces e lateribus hærentes eodemque encausto illitas præcellit, e tænia serica coloris nigri undatique operis ad collum pendentem, cum omnibus privilegiis, gratiis, et prærogativis,
quibus cæteri ejusdem Ordinis Equites pro suo quisque gradu gaudent, vel in posterum gaudebunt. In quorum fidem hoc diploma manu nostra subscriptum ac pendente sigillo majori Resurrectionis Dominicæ ex alba cera
confecto munitum, expediri decrevimus.
Datum Hierosolymis ab ædibus Patriarchalibus die duodecima mensis Aprilis Anno Domini millesimo octingentesimo nonagesimo octavo
Ludovicus Patriarcha
De mandato Exmi ac Revmi Domini
G. Barberis
Cancellarius