Ich Märtl von Leulesdorf Vergich offenbar an dem prief fur mich vnd fur all mein erben vmb meinen ganczen
weingarten ze Pulka gelegen in der ob(er)n Holczriwnt ze nachst der Hecznerin weingarten mit ainem rain vnd zenachst
chrystans des Weidner weingarten mit dem andern Rain den ich auch ze purchrecht han gehabt von dem edlen vnd
meinem gnädigen herren Graf Purchharten von Maidwurg do von ich im hab gedint all jar jerleich an sand Michels tag
dreizzig wienn(er) pfing ze purchrecht vnd nicht mer Den selb(e)n vorgenanten weingarten mit allen den rechten vnd ich in
in purchrechts weis vnd geuer her pracht vnd gehabt han hab ich recht vnd redleich v(er)chaufft vnd hin gegeben di zeit
do ich ez wol getuen macht dem erwirdigen vnd geistleichn herren hern Otten di zeit Abt des erwirdigen Gotzhaws ze
Hochenfurt vnd auch dem ganczen Conuent desselb(e)n gotzhaws vmb Sechzehen pfunt wienn(er) pfennig der ich vnd mein
erben gancz vnd gar von in gericht vnd wezalt pin an allez verziehen Ez schullen auch di vorgen(anten) all der Abt vnd daz
Conuent des obgenanten Gotzhaws in den vorgenanten weingarten ledigleich vnd vnuerchumert von vns hab(e)n vnd
zu ir(e)m frum wenden wie in daz aller pest fuegt mit v(er)seczen v(er)chauffen geb(e)n wem sew wellen an allen p(er)spul vnd an
allen chrieg Ich pin auch des mit sampt meine(n) erben ir recht(er) Gewern vnd geuer fur ansprach vnd in well od(e)r
chrieg oder waz in mit recht dar an ab get daz schol ich in allez auzrichten vnd abtragen an all ir schaden vnd an
all ir miet als purchrechts recht ist vnd des landes recht ze Osterreich daz versprich ich mit sampt meine(n) erben
dem egen(anten) erbir(n) herren h(er)r(n) Otten dem Abt vnd dem ganczen Conuent des obgen(anten) Gotzhaws ze Hochenfurt stet ze haltn
mit meine(n) trewn an all(e)z geuer mit vrchund des prief Vnd seid ich selb di zeit nicht aigen Insigel het So hab ich
vleizzig gepeten di erbir(n) p(er)d Jansen den freuntlein ze pulka vnd Seuczlein den fewcht daz sew des chauffs vnd der sach ge
zeug sind mit irn anhangunden Insigeln in peden an schadn Vnd der selb(e)n p(er)d anhangunden Insigl an dem prief b(e)
pint ich mich vorgen(anter) Märtl von Leulesdorf mit sampt meine(n) erben alles des vollaest sein vnd auch stet hab(e)n daz
vor an dem prief geschrib(e)n ist der prief ist gegeb(e)n nach christs gepurd drewzehn hundert jar darnach in dem
Siben vnd achczigisten jar an sand thomans tag des heiligen zwelfpoten