CAPITVLVM ET CANONICI
Sacrosanctę Lateranensis Ecclesiæ omnium Vrbis, & Orbis Ecclesiarum Matris, & Capitis.
DILECTIS Nobis in Xpo Præposito, & Canonicis Lateranen(sis) Ecclesiæ Collegiatæ sub Titulo Omnium Sanctorum Ciuitatis Olomutien(sis) salutem in Dno sempiternam. Singularis
deuotionis affectus, quem erga Sacrosanctam Lateranensem Ecclesiam gerere comprobamini, non indignè promeretur, ut votis vestris, per quæ Diuinus Cultus, & Animarum Christifidelium
salus procuratur, quantum ex benignitate Sedis Aplicæ possumus fauorabiliter annuamus. Exhibita siquidem Nobis pro parte vestra petitionis series continebat, quod Vos ob singularis
deuotionis affectum, quem ad Saluatorem D. N. IESVM Christum, & ad utrosque Sanctos verè DEI amicos Ioannem Baptistam, & Ioannem Euangelistam, eisque dedicatam Sacros(anctam)
Lateranen(sem) Ecclesiam vestistis, & ad p(ro) maiori deuotionis ardore inflammati geritis summoperè exoptatis Ecclesiam vestram Collegiatam sub Inuocatione Omnium Sanctorum
Existen(tem) in Ciuitate Olomutien(si) Sacrosanctæ nræ Lateranen(si) Ecclesiæ unire, aggregare, submittere, & incorporare, ad hoc, ut Indulgentias, facultates, & alias spirituales gratias eiusdem
nræ Sacros(anctæ) Lateranen(sis) Ecclesiæ ipsi vestræ Ecclesiæ Collegiatæ Omnium Sanctorum concederemus, & propterea Nobis humiliter supplicari feceritis. Nos igitur attendentes piam petitione(m)
vestram Animabus Christifidelibus valdè utilem, rationabilem, proficuam, & licitam esse, attento SSmi D. N. Benedicti Papæ XIII. feliciter Regnantis fauorabili Rescripto sub datum
apud S. Petrum die IV. Mensis Iulij currentis Anni 1729 = Derogatorio Literis Apostolicis, & quibuscumque in contrarium facien(tibus) etiam quoad consensum Loci Ordinarij requiren(dum), & non obtentum,
in authentica forma Nobis exhibito, quod in nostro Archiuio asseruatur; vestris precibus annuere volentes, unà cum Illmo, & Rmo D. Alexandro Tanari Signaturæ Iustitiæ SSmi D. N. Papæ Votante, Emi, & Rmi Dni D. Benedicti S. Mariæ in Via Lata S. R. E. Diaconi Cardinalis Pamphilij nuncupat(i), & nræ Sacros(anctæ) Lateranen(sis) Ecclesiæ Archipresbyteri, Vicario, in Papali Rom(an)o nostro Lateranen(si) Patriarchio,
ut moris est, Capitulariter congregati, auctoritate nrâ ordinaria, & qua vigore Indultorum, et Priuilegior(um) Apostolicorum Nobis, Ecclesiæq(ue) nræ Lateranen(si) a Summis Romanis Pontificibus concessorum,
& confirmator(um) fungimur, in quorum usus possessione sumus, ac stante facultate Nobis, ut supra vigore laudati Rescripti SSmi D. N. Benedicti Papæ XIII. exhibiti, delegata, omnique alio meliori, quo possu=
mus modo, enunciatam unionem, aggregationem, submissionem, et incorporationem ipsæ vestræ Ecclesiæ Collegiatæ sub Inuocat(ione) Omnium Sanctorum admittimus, & incorporamus, ac eamdem in
nostræ Lateranen(sis) Ecclesiæ tamquam membrum eiusdem, iuxta facultatem a Summis Pontificibus Nobis concessam, ac iuxta Sacros(ancti) Concilij Tridentini Decreta recipimus, necnon in Dno concedimus,
atque elargimur, Indulta, facultates, Indulgentias, & alias spirituales gratias, quibus supradicta nra Lateranen(sis) Ecclesia potitur, & gaudet, & quarum series hæc est = Ab initio siquidem Constantinus
Magnus Imperator postquam in ea per Sacrum Baptismum a S. Siluestro Papa fuit mundatus a Lepra, dixit: Eccè Palatium meum in Ecclesiam Dei conuerti, effunde ergo super eam tuam largam benedictionem pro
omnibus confluentibus ad eam, et S. Siluester respondit: Dnus Noster IESVS Christus, qui Te a Lepra mundauit, et Sanctificauit Sac(ro) Fonte Baptismatis, per suam misericordiam purificet, & mundet omnes accedentes ad
eam sine lethali peccati labe, & sit illis in remedium omnium peccatorum = Insuper in Ara maxima sunt quadraginta octo Annorum Indulgentiæ, et totidem quadragenæ, ac tertiæ partis omnium peccatorum remissio =
Item S. Siluester Pontifex concessit Sacello, cui nomen est Mortuorum apud Sacrarium dictæ Ecclesiæ, quod quoties quis Sacrum in Ara ibi collocata celebrauerit, extrahat e Purgatorij pœnis Animam unam = Item Bo=
nifacius Papa Octauus dixit, quod si quis causa Deuotionis, Orationis, aut Peregrinationis ad Sedem nostram Lateranensem accesserit ab omni peccati immunditia liber existat = Item in festo Dedicationis Basilicæ
Saluatoris, cuius Icon ibi Romano Populo mirabiliter apparuit, dum a Beato Siluestro Papa consecraretur, die nona Nouembris, est Indulgentia plenaria = Item S. Gregorius Pontifex, qui eamdem Basilicam ab
Hæreticis deuastatam, moxque restitutam, denuo consecrauit, ac confirmauit Indulgentias omnes per B. Siluestrum, & alios concessas. = Item Dominica prima Quadragesimæ habetur Statio, & Indulgentia plenaria
omnium peccatorum remissio. = Item Dominica Palmarum est Statio, & omnium peccatorum remissio. = Item in die Cœnæ Domini est Statio, & plenaria omnium peccatorum remissio. = Item Sabbato Sancto est
Statio, & plenaria omnium peccatorum remissio. = Item Sabbato in Albis est Statio et quamplurimæ Indulgentiæ = Item a die sexta Maij usque ad decimamquintam mensis Augusti sunt in eadem Ecclesia Lateranen(si)
quamplurimæ Indulgentiæ = Item secunda die Rogationum est Statio, & quamplurimæ Indulgentiæ = Item in vigilia Pentecostes est Statio, & quamplurimæ Indulgentiæ = Item in Vigilia Natiuitatis S. Ioannis
Baptistæ a primis Vesperis usque ad occasum Solis diei sequentis est Indulgentia plenaria = Item in festo Transfigurationis D. N. IESV Xpi multissimæ sunt Indulgentiæ = Item in die Decollationis Sancti
Ioannis Bapt(ist)æ sunt permultæ Indulgentiæ. = Item in festo S. Ioannis Apostoli, & Euangelistæ habetur Statio, & multissimæ Indulgentiæ = Item Eugenius Papa Quartus quotidie concessit Ecclesiæ Late=
ranen(si) Indulgentiam plenariam, et omnium peccatorum remissionem omnibus Christifidelibus verè confessis, et contritis visitantibus ipsam Ecclesiam Lateranensem, ut apparet ex sua Bulla sub datum
die 2. Iunij 1446 = Item in Sacello S. Ioannis Bapt(ist)æ, quod dicit(ur) in Fonte, ubi Constantinus Imperator salutari Aqua aspersus est, & in quod ob loci sanctitatem numquam fœminæ ingrediuntur, quotidie
est omnium peccatorum remissio. = Item in Sacello Diui Laurentij, quod vocatur Sancta Sanctorum, ubi est vera Imago Saluatoris D. N. IESV CHRISTI Opere Diuino depicta, multissimæ,
& pretiosæ Sanctorum Reliquiæ, atque in eodem ob maximam loci sanctitatem numquam Mulieribus ingredi licitum est, sunt multissimæ, & infinitæ Indulgentiæ, ut in fronte illius hæc verba decla=
rant: Non est in toto sanctior Orbe locus. = Item in Sacello D. Thomæ apud maximam eiusdem Ecclesiæ Aram, Orientem versus, in quo locatur Arca Veteris Testamenti unà cum Moysis Virga, &
Aronis Baculo, simulque magna Mensa, in qua Christus Dominus cum Discipulis suis cœnauit, plurimæ habentur Indulgentiæ = Item Innocentius Pontifex dixit, adeò magnæ, et infinitæ sunt
Indulgentiæ Lateranen(sis) Ecclesiæ, ut numerari numquam possint nisi a solo DEO, quas omnes ego met confirmo = Denique Bonifacius Pontifex dixit, Si scirent Homines quot sunt Indulgentiæ in
S. Ioannis Lateranen(si) Ecclesia a multis Pontificibus concessæ, non esset opus Hierosolymitanum Sepulchrum, neque Sanctum Galitiæ Iacobum inuisere. = Quas quidem Indulgentias in vim fa=
cultatum Nobis, ut supra concessarum, supradictæ pariter Ecclesiæ vestræ Collegiatæ Omnium Sanctorum in Domino concedimus, & elargimur. Volumus autem, ut deinceps perpetuis futu=
ris temporibus quouis Decimoquinto Anno a Data præsentium huius nostrarum Literarum submissionis, & aggregationis renouationem, siue confirmationem a Nobis petere, et obtinere
teneamini, Successoresque vestri teneantur, aliàs elapso dicto termino, ac per Vos, & Successores vestros non petita, & obtenta præfata Literarum renouatione, siue confirmatione, ab omni jure, quod
Vobis per pntes acquiritur illico cadatis, Successoresque vestri cadant, ac Literæ nullius sint vigoris, & roboris, in contrarium facien(tibus) quibuscumque non obstantibus. Dat(um) Romæ apud Lateranu(m)
Anno a Natiuitate D. N. IESV CHRISTI Millesimo septingentesimo vigesimo nono, Die verò X. Mensis Iulij = Pontificatus SSmi D. N. PAPÆ BENEDICTI XIII. Anno VI.
~An(tonius) Fran(cis)cus de Rubeis Can(onicus) Secr(etarius) Cons(istorialis)~
~Matthæus Maylinus Can(onicus) Secr(etarius)~