NOS THADDAEUS MARTINUS SLAVIČZEK
COLLEGIATAE CANONICORUM REGULARIUM CONGREGATIONIS S(ancti)
Salvatoris Olomucii ad omnes Sanctos, & Landscronae in Bohemia Praepositus Infulatus, SS(acrae) Theologiae Doctor, Fa=
cultatis Theologicae in alma Universitate Olomucensi Praeses & Director, nec non pro tempore Rector Magnificus
Marchionatus Moraviae Praelatus, Ioannes Demel Decanus, Rajmundus Zischka Senior, & totum Capitulum.
LECTURIS SALUTEM IN DO=
MINO.
ETSI UNIVERSIS CHRISTI FIDELIBUS PROMPTA
Charitate spirituali communicanda sint beneficia, illis tamen, qui in Insignem Collegiatam nostram Ecclesiam sub titulo
Omnium Sanctorum, & in nostram Sacram Lateranensem Congregationem specialem benevolentiae suae affectum praeferunt,
& quos spiritualis dilectionis praerogativa ardentiori in nos accendit desiderio, abundantius convenit nostra pietatis officia
elargiri, ita, ut quibus spiritualiter in terris amico jungimur consortio, ijsdem aeternum in coelis, quantum in Domino
mutuis meritis adniti valemus, uberiori jungamur & praemio. Sane ponderantes in Admodum Reverendo, Praeno=
bili, Venerabili ac Eximio Domino ENGELBERTO SCHMID AA(rtium) LL(iberalium) Philosophiae Magistro SS(acrae) Theologiae Baccalaureo formato, & Wischcoviensium
Parocho et Decano foraneo, a plurimis annis syncerum erga Canonicam Domum nostram affectum, atque exhibita peculiaris amicitiae
officia eundem singulari fraternae dilectionis vinculo constringimus, & in foedus Confraternitatis nostrae perpetuum praesentium
tenore assumimus, illique de Omnipotentis Dei misericordia & liberalitate optime confisi, tum Sanctissimae Protectricis
nostrae Immaculatae semper Virginis Mariae, Sanctorum Apostolorum Petri & Pauli, Sancti Patris nostri Augustini, ac
omnium Sanctorum Patronorum nostrorum pia intercessione suffulti, cunctorum nostrorum suffragiorum, Missarum,
orationum, divinorum officiorum, vigiliarum, abstinentiarum, laborum, ac denique cunctorum bonorum spiritualium, quae divi=
na Clementia per nostrae Congregationis fratres praesentes, & futuros operari dignabitur, plenam Communicationem, et parti=
cipationem amanter in Domino concedimus, & elargimur, eundem intra nostrae militiae castra tam in vita, quam morte
harum serie recipientes, et cooptantes. Idque in nomine Dei Patris, & Filij, et Spiritus sancti Amen.
Dabamus hasce Capitulariter congregati in Canonia ad Omnes Sanctos Olomucii, easque consvetis nostris sigillis muniri feci=
mus. Die 23(ti)a Decembris Anno 1769.
Thaddaeus Martinus Slaviczek
Idem, qui supra m(anu) p(ropria)
Joannes Demel Canon(icus) Regul(aris)
Lateranensium Olomucii ad OO(mnes) SS(anctos)
Decanus m(anu) p(ropria)
Raymundus Ferdinandus Zischka
Eiusdem Collegiatae Canoniae Senior m(anu) p(ropria)
Franciscus de Paula Wolff
Ord(inis) Notarius
& totum Capitulum m(anu) p(ropria)