Fridreich (et cetera)
Getrewer von got Vns haben e(r)ber die gemey(n) von Znaym als geschrib(e)n vnd sich
beÿ künigclich(e)n gnaden vber dich erclagt wie sÿ von solh absag wegen
die du In habest getan in vns(er) lannd gen Osterreich mit Ir war vnd kaufman
schafft nicht gearbait(e)n noch Iren gewerb(e)n getreib(e)n mügen als sÿ dann vormal(e)n
pflegen haben betun vnd wissen doch nicht daz sÿ das ÿe vmb dich geschuldt
od(er) ichtz wider dich getan hab(e)n vnd haben dessgeleich(e)n vns(er) lieb(e)n mümen
der künigin von vng(er)n e(r)ber auch geschrib(e)n. Wann vns ab(er) die vnd ander dein
handlung die du wider lannd frid vnd lanndsrecht hast getan greifflichen miss
vallent Wan du vns vnd dem lannd gross swer(e)n angriff damit mach(e)n
möchtest Darumb gepiet(e)n wir dir beÿ vns(er)n künigclich(e)n gnaden vnd
hulden daz du denselb(e)n burg(er)n wenn sÿ mit solh Ir hab vnd kaufman
schafft in das ege(nannt) vns(er) lannd faren furbasser kain Irrung noch angriff
tüst vnd habst du zu In ichtes ze sprech(e)n daz du das richt(e)n vor vnser
mit vns(er)m lannd pfleg(e)r vnd darinn nicht and(er)s handlest Das ist vns(er)
ernstlich mainung. Geb(e)n zu d(er) Newnstat am sambstag sannt
Elspethentag Anno (et cetera) xlmo vns(er)s reichs im ersten Jare.