Elizabeth von gots gnaden Kunigin zu ungern dalmacien croaci(en) (etc.)
Erbling zu Behem H(er)tzogin zu ost(er)reich zu Steir und margg(ra)fin zu merh(e)rn

Un(ser)n lieben getrewen Als wir euch yecz am nachsten bey un(ser)m getrewen diener
dem haunssken auch un(ser)m liebn getrewen dem Czenst von lestowicz un(ser)m hauptm(an)
bey euch von ettlicher czerunge und geldis wegn uns zu un(ser) notdurft von den
Juden in un(ser) stat bey euch wonende aufczurichten und bey dem yeczg(e)n(an)ten
un(ser)m diener dem haunssken zu sendn geschriben habn nu v(er)nemen wir daz
der selb un(ser) hauptman yecz nitt bey euch sey da durch auch sulch sache deß
halbn gehindert und v(er)czogen mochten werdn das uns nitt wol beqweme
Darumb begern und pitten euch in sund(er)m vleysse daz ir auf diczmal un(ser)n e(r)n
un(ser) notdurft und nitt der Juden wolgefalln und anfreden anseet und
sulch gellt uns ynn ain(er) czerunge von in(n) ye pesser aufrichtet und dann
das bey dem haunssken durch euch selbist schicket und sendet daz wir d(er)mitt
nitt geseumet sunder gefurdert w(er)den und tuet doran kain and(er)s so w(er)re ir
wolliet daz wir des hinfur in and(er)n sachen gey euch in guete nitt v(er)gessen sulln
Gebn zu wienn am montige noch sannt veits tage Anno d(omi)ni (etc.) xlii(o) (etc.)

p(er) Nicolau(m) Sokol de lamberg