Fridrich von gotes gnaden Romischer kunig zuallenzeiten
Merer des Richs Herzog zu Osterreich vnd zu Steir (et)c(etera)

Besunder lieben Als ir vns itzunt geschriben habt von des tages wegen den etlich h(er)r(e)n von Merhern zu znoym
bei euch zuhalden meinen auff den nechsten pfingstag in der ersten vast wochen. Nu lassen wir euch wissen
das vns der Bischoff vnd die herren noch gar nichts von solichs tags wegen zugeschriben haben vnd ist
vns auch nicht kundig dann als uil ir vns geschriben habt Nu haben wir vormals ee vns ew(er) brieff
komen ist aufgeschriben dem Bischoff vnd den h(er)r(e)n das wir einen tag durch vnser landtherren vnd
stete von Osterreich g(er)n besuchen wolten vnd alzit willig gewesen sein durch frides willen paider lande
vnd haben darumb denselben h(er)r(e)n geschriben das wir die vnsern auff den Sontag letare in der vasten
nechstkunfftig gen Snoym senden wollen den sachen gutlich nachzugeen in masse als wir alzeit
begert haben von den wir noch kein antwurt haben was vns aber zuantwurt wirt wollen wir euch
gern wissen lassen wann wir ye gern sehen das die land in guter nachperschafft vnd handlung
mitenander weren. dann als ir begert mit dem kienberger vnd den andern zubestellen ein frid zuhalt(e)n
damit ir euch vmb vastenspeiss von des tags wegen bewerben mochtet Also haben wir euch offt ge
schriben was euch von in widerfert das vns das nit lieb ist aber sy halten sich in vngehorsam Nu
haben wir nach in gesant komen sy nit so wollen wir ew(er) gern gedenken nach dem pesten als ir
von vns hinfur wol vernemen werdet Geben zu Wienn an Sontag vor vnser lieben frawen tag
der liechtmesse Anno (et)c(etera) xlvto vnsers Richs im funften jare

Ad mandatu(m) d(omini) Reg(is)
~p(er) d(omi)n(u)m~ ~T(h)om(am)~ ~Eben~