Wir Eemunt von Luchtenburch Tichen vn(d) Tuin kvnt allen den die disen gegen
wertigen prief lesent ader horen lesen daz wir den got gesedigen frawen der
Abteissinne vn(d) al gemeine der samenunge des closters zv Ozla recht vn(d) redlich
haben zv eime rechten pfande gesetzet zehen marc gulde In den drein dorfern
Radcawitz Budensic vn(d) Batschiz vur sibenzik marc grosser pragisser pfenninge
vier vn(d) sechzik grosse vur iegliche marc Also bescheidenlich daz die vorgenanten
frowen die selben gulde in den genanten dorfern nach pfandes recht sullen Inne
haben als lange vntz wir ader vnser erben die selben gulde vmb die vorgenanten
sibenzik marc wider sie ge ledigen vn(d) gelosen wir haben auch bei namen auz ge
nomen swanne wir in die vorgenanten sibenzik marc halp richten mit guete ge
wissen daz si vns zehant funf marc gulde sullen wider abetreten vn(d) die andern
funf marc gulde sullen sie Inne haben als lange vntz wir sie aber ader vnser erben
von in gelosen vmb daz ander halbe teil der sibenzik marc wir haben auch getrev
welich gelubt an alle arge list daz wirs wellen gerne steten vn(d) be friden als ander
vnser dingen Geschehe aber daz zv gotes genaden state daz wir ab leibich wurden
ee danne wir die gulde von in geladigeren vn(d) geloseten so sol vnser hausfrawe
vor allain vn(d) vnser erben den selben frawen gentzlichen laisten alle die gelubde
die wir den frawen an disen gegenwertigen priefe haben gelubet daz dise gelubde
vn(d) dise rede stete vn(d) vnverwandelt behalden werden dar vmbe habe wir disen
prief der abteissinne vn(d) der samenunge gegeben In sigelt mit vnserm In sigel
diser gelubde vn(d) diser satzunge gezeugen sint Zmil von Grunwalt wolfram sein
pruder Bohuzlab von schevkwitz Jarosch von widern Marsick von knienitz
Marquart der snite vn(d) phillip von Jdaibow diser prief ist gegeben da von
Cristes gepurt ergangen waren Tausent vn(d) dreuhundert Jare dar nach an dem
zehenden Jare an der ailf tausent maide tak