Ich Jesko von Greliez, Ofka meyn hausvraw, vnd allew vnser erben, Tun chunt offenbar myt disem prif allen
leyten, daz wyr myt wolbedachtem mut, vnd mit gutem rat, aller vnser freunt, vnd auch myt gunst dez edeln
fursten hern Jostes markgrauen vnd herren czu merhern vnsers genedige herren, in dem dorf czu dreskawicz
gelegen pey dem dorf, das do haisset Jvicz, Neymthalb lehen vnd dyer hofstet, vnd czwen echer, dy do czinsen
rechtes erbes czins, allew Jar, gerichleich, czehen mark an ayn vndung grosser prager phennyg merherysser
czal vnd berung, mit den holden, vnd mit allem das dar czu gehert, vnd auch gemaynleich mit allem rechtem
vnd Nvczen vnd herschaft, als wyer sy vncz daher gehabt haben vnd besessen, Vm dreyczehen vnd hundert mark
guter grosser der forgenanten czal vnd phennyg, vnd auch forchawfen, auf geben, vnd leyhen mit disem prif
czu rechtem erb, den geystleichen Jvnkrawen, Annan der Ebtissin, vnd dem ganczen Conuent des chlosters czu
ossla, czu haben, czu halden, czu nuczen, czu forseczen, czu forchaufen, frydleich vnd frybleich, vnd ebichleich czu be
sytzen, vnd geloben Jn, vnd mit samt vns, dy erbern leyt vnd herren, her Haynreich von lobozicz, vnd der fest ritter
her hyngram von Jacubaw, her Jan von hawlycz, her Ezyrnyu von ohawecz mit gesamter hant vnforzchaidikley
chen pey vnsern guten trewen, an aydes stat, dy forgenanten guter czu freyen, vnd czu beschirmen, for allen an
spruchen, vnd ab schuten, von wem das wer, ader wy das geschech, vber drew Jar, nach landes recht, vnd gebonhayt
czu merhern, vnd entweren, vnd sew Jn frydleicher besyczung, der e genanten gvter stetmen vnd hayen.
Tet wyr des alles nycht als for geschriben stet, welch czwen, dan vnder vns, von yn werden darvmme gemant
di schellen laysten czu hant, mit czwayn chnechten, vnd mit vyr pferten, czu prynne in dy stat, in ayn ersam gast
haus, wo yn wyrt hyn geveyst, vnd do laysten, als yn ligenz recht ist, vnd nych aus chumen, pey iren guten trewen
an der forgenanten geystleichen Jvnkrawen willen, Vnd wan wyr vyr czehen tag laysten, wyr laysten oder nicht,
So schol myt vollem gebalt, der hawpman czu merhern, wer dy weyl ist, vns, vnd allew vnser gvter, auf halden,
vnd phenden, wo er vns, oder si vindet, in merhern lant, oder auser lant, si seyn haimlich, oder vn haimlich, mit
vnserm gutem willen, also lang, vncz das ez alles vol pracht werde, was dyser prif saget, vnd allew di scheden
di si do von emphahen, vnd redleichen werden beweist, yn werden widerchert, von vns, vnd von allen vnsern
erben, vnd des czu ayner guten gewissen geb wyr Jn disen offen prif forsigelt myt vnsern aygen anhangenden
Jnsigeln, des czeug seyn di erbern festen ritter vnd herren, her peczmyl von Greliez, her Eznet, vnd her wernusch
pfarrer von possycz, her mathes von sczywyrnik, her Adam pfarrer von Jamoycz dy weyl probst czu ossla,
vnd her Nyclas pfarrer czu ossla. Der prif ist gegeben nach cristes gepurd, in dem chloster czu ossla, nach
dreyczehenhundert Jaren, in dem acht vnd sybenczkisten Jar, an sant Eyligen, des heyligen peychtigers tag.