Wier Eufemia genant Bosthawserin dy zeit priorin vnd der gancz Conuenth sand
Anna klosters inder Alten Brunn Prediger Ordens yez vnd hinach kunftig pekennen
offentlich mit disem prieff fuer allen de in sehen ader horn lesen Als wier haben gehabt
ein viertail eines walds pey vnserm dorff Schelschitz gelegen der zu vnserm kloster
von alterheer rechtlich zugehort hat des wier nit fuegsamlich wol haben mugen nuczen
vnd prawchen noch vnserm vnd des klosters pesten vnd frumen Sunder zuchar zu Jar
haben schaden daran genumen Solichs mangelshalben hab wier obgemelte priorin vnd
Conuenth zu aufnemung vnd pessrung vnsers obgemelten klosters Sand Anna den selben
wold mit wolbedachtem muet vnd noch ratt frumer lewt Erblich vnd zurechtem
Erblichen purkgrecht verkawft vnd in kraft dis priefs verkawfen vmb einen Järlichen
zins Anderhalb schok gueter gabiger muncz markgravischer zal Den Erbern Pawl pawer
mercz hofer Lorenz choppath vnd wenczl karl vnsern lewtn vnd jern Erben vnd
nochkomen de dy hoflehen rechtlich haben wurden da zu Schelschitz Doch in solicher
vnderscheid das der selb obgemelt wold schol alayn genuczt vnd gehalten wern von den
selben de dy hoflehen haben wurden Vnd hinfuer nimer quewigen zeiten darvon nit
gesundert noch verkawft werden vnd darub so sollen dy obgemelten Pawl mercz
Lorenz vnd wenczl vnd auch jer Erben vnd nachkome vns vnd vnserm Conuent
alle Jar Järlich dy anderhalb schok zins ausrichten vnd vnserm Ambman vnverczogelich
geben auff sant mertes tag an alle widerred Des zu vrkund vnd Ewiger pestettigung
hab wier obgemelte priorin vnd auch das Conuent vnser Infigel payde lassen an disen
prieff hengen Der geben ist nach Cristi gepurd Tawsent vierhundert vnd in dem
drey vnd achczigisten Jar den mantag vor sandt michelstag des Erczengl