Wir Elizabeth von lompnicz Priorin vnd der gancz Conuent des Closters czu Sand Annen
Jnder alten Brinn des ordens der prediger genant des heylig(e)n Dominici Tun kund vnd offenlich
mit disem briff alln lewtn die Jn sehn oder horn lesenn das wir mit wolbedacht(e)m mut vnd mit
volenczem ratt die czeit vnd nur das wol tun vnd lassen mochten durch vns(er)s closters nucz vnd
bessermug wegen willigkleichn gebn vnd verleihn vnd mit krafft des briffs gebn vnd verleihn
habn vns(er)n libn vnd trewn Stephan vnd Adam gebrudern von Schesspicz vnd alln ir(e)n
Erben denn hoff gelegn czu Schesspicz czu einem purkrecht mit ackern gepawen vnd vnge
pawen gwissessen holcz smacken vnd mit all(e)r zugehorung was von alt(e)r her czu disem hoffe
gehort hatt Also das sie des selbn hoffs geniesen mogen vnd damit auffkauffen vnd verkauffn
mit vnserm guten willen der dem closter nucz vnd frum sey wie offt vnd sie welln Ausgenumen
das ein yegleicher der awff dem hoff siczett kayn ander herschafft nicht neme wenn die Priorin
vnd denn Conuentt oder denn beschirmer vnd vorweser des egenan(ten) Closters die hr(e)n von lompnicz
vnd awch von dem obgenan(ten) hoffe mitleiden als der nider vnd der ober gewelspalbe der da
awff dem purkrecht siczett Auch sulln die obgenant(e)n Stephan vnd Adam vnd all ir Erben
vnd nochkomling die awff dem selbn hoff siczen Jarlichs czins gebn vnd reihn der egenant(e)n
Priorin vnd dem Conuet drithalb mark grosser guet(e)r phennig czins Jm Jar awff Sand michelo
tag vnverczugleich Vnd czu ein(e)r pessern Sicherhaitt der obgenant(e)n sach vnd verleihung habn
wir vnser Jnsigl an diesen briff angehangen vnd verheissen Jn alles das stet czuhaldn
bey vnsern guten trewn augen Vnd Jch Jan von lompnicz vorweser vnd beschirm(er) des egen(anten)
Closters hab mein guten willen gebn den hoff also awffzunemen vnd verleihn dem egen(anten)
Stephan vnd Adam vnd ir(e)n Erbn versiglt mit meim anhangend(e)n Jnsigl der da gebn ist czu
Brinn Nach cristi gepurd Virczehnhundert Jar in dem Newnczigst(e)n Jar an Sand Agnetn
tag (et)c(etera) (et)c(etera)