Ich Wenczlab schrancz vnd katherina sein Eliche hawsfraw mit vnssern erben vnd Nachkome bekennen
mit disem prieff das wir von grosser not die vns darzu gedrungen hat Redlich vnd Rechtlich vkawfft
haben vnd mit der gegenwirt vkawffen ain halbe Marck groschen phennig Meherischer zall vn(d) weru(n)g
wares gerechts vnd plosses Jarlichs zinses vmb funff Marck groschen vorgemelter munse vnd zall den erwir=
digen vnd got der geben Junckfrawen swester Regina die zeit priorin vnd dem ganczen conuent des klosters
vnsser lieben frawen zu swester hedwig in der stat Brunn auff vnsse(r)m haws mit seiner zugehoru(n)g auff
der bemelte(n) Junckfrawen meiner gnedigen herschafft grunt auff der swaben gassen gesessen zwischen don
Jorg led fuesse zu der ain seiten vnd Nicklas ziegelstreicher zu der andern seiten vnd den auff den nagst
kunfftige(n) zu Weynachten an zu heben ain halbe Marck groschen vnd hin fur alle Jar Jarlich all mal auff den
bestumbte(n) tag zu Raichen vnd zu zinsen gancz frey in an alle pured vns auff legund vnd ob wir das nit tette(n)
do got vor sey so sol denn die vor bemelten Erwirdigen swester Regina priorin vnd der gancz couent gancze
vnd volkomen gewalt haben soliche(n) versawmpte(n) vnd vnbeczalte(n) zins erfodern vnd ausz pringe(n) auff
vnsser schaden an allen widerstand gaistlichs oder weltlichs Rechtens vnd so wir wellen vnd vns das
geluck fuegt Mug wir den bemelte(n) zins ain halbe Marck mit funff Marck groschen bestimbte(n) munse
vnd zall wider vmb ablossen vnd abkawffen mit sambt dem bsessen zinse auff die zeit gepurund gancz
beczallundt dem allen zu ware(n) vrkundt vnd czeugtnusse haben wir gepeten die erbern vnd weisen hern
Seruaczi vn(d) wenczlab toller payd Burger zu Brunn ir Ingsigil an disen prieff haben lasen hengen
doch in vnd iren Erben an schaden Geben zu Brunn in der octau(a) corpis xp(ist)i Nach xp(ist)i gepurdt tausent
vierhundert vn(d) in dem zway vnd Newnczigisten Jar