Wir Jacobus linck Burgmeyst(er) Johannes pawfrencz Niklas pong Johannes lilgenplut Ratmannen Niklas plain Niklas paygl Michl landl luars fleyschhack Joh(an)ns Czecz hanns
glosser vnd aintl keyser Gesworn Schoppfen der Stat Olomucz Thun kundt vnd offenwar mit diesem brief vor allermenniklichen Als vns die Andechtige Junckfraw dorothea swest(er)
vnd Ebtissin des Closters vnd Conuents zu sant Claran in vnsern vorburck gelegen den Erbn Nicolaum Brod Jren vngezweiltn Brud(er) hiefur mit vns vmb Jren Erbteil anlangte
vnd vor vns anredte foderund Jren teil alles des was sy baiden Jre Eldn vater vnd muter beschaiden vor schaft vnd noch sy gelassen haben Es sei an erben vnd an Czinssen doran
Sie gleichen teil begt vnd haben wolt dorumb die itzgemeltn Nicolaus Brod vnd sein Swest(er) dorothea nach vorhenkunfft mit Rate vnd willen Jrer oberstn vnd Eldn vnd gut
freunde sich selbs sam Brud(er) vnd Swest(er) angehort gutlich beredt vorricht vnd gancz geeynt haben in sulich mas das der egen(ant) Nicolaus Brod der voormeltn seiner Swest(er) dorothean
der vierundzwainczig mark ierliches Czinsses die sy vor vnd mit vnd auch die selbs vff vnser Stat Olomucz von Camerleuten vorfart haben vnd furstenhafen brieffen
vnd Sigeln all Jar zunemen Zwelf mark ierliches Czinsses abgetretn ist vnd hiemit abtrit benumpt vnd beschaidet lediklichen zuhaben vnd zunemen halb vff sant Jorgen
tag schirist kunnende vnd halb dornach vff sant Michels tag der dieselbe Junckfraw dorothea den halben teil als Sechs mark furpas den Gotzostrewtn Junckfrawn der Ebtissin
vnd dem ganczen Conuent des egen(ant) Closters sant Claran beschaid hat vnd in craft ditz briefs beschaidt vorgibt vnd benumpt fur die kost die man sy gibt vnd das man Sie
mit Jrem geprechen vfgenomen hat vnd an sy ende halden sal in sulich mas als man Sie bies hieher gehalden hat Vnd die vobezigen Sechs mark Czinsses sollen derselben
Junckfrawn dorothean all Jar gereicht werdn vngehind(er)t In Jren henden Ir zutemisse vnd sust nymants die weil Sie lebt doran so ist dieselb Junckfraw dorothea derselben
Sechs mark Czinsses die sy gepurn gancz vnd gar mechtig bai Jren lebtegen ad(er) an Jrem todbett mit wissensthaft erb lewt Geystlich vnd werntlich zunorschaffen zubeschaid(en)
vnd zunorgeben Jniemand ad(er) zueicztgen wem Sie wil es sei ym Closter ad(er) ausserhalb ir Closters Jrem Brud(er) frunden ad(er) fremden geystlichen ad(er) werntlichen von Jren oberstn
vnd eldn vnd sust allermenniklichn vngehind(er)t So sal der and(er) halbteil als Zwelf mark ierliches Czinsses der obgemeltn Sum(m) doran alle vnd itzliche habe Gut vnd Erbe wa
rund vnd vnwarund es sei hie ad(er) anderswo vnd nemlich das haws in vnser Stat an der eck bai h(err) niklas vom hymlant haws vnd auch das ackel haws vor Gewibler tor gelegn
so Jren Brod vnd Anna Jre Eldn nach sy gelassen haben dem egen(ant) Nicolas Brod lediklichen gepurn zubesiczen zugeprauchn zunemssen vnd zunorthun nach seinem pesten
bedunken an alle wid(er)red sein obgen(ant) Swest(er) dorothean An so vil awsgenomen das derselbe Nicolaus Brod sein Swest(er) dorothean alle Jar zwo mark geben vnd reichen sal
halb zusant Jorgen vnd halb zusant michels tegen an wegen der Czinss die man von dem vobemeltn ackel haws gibt so lang vncz man dieselben zwo mark ierlich gabe mit
zwainczig marken abledigt die do auch der obgen(ant) dorothean lediklichen gepurn do mit Sie auch zuthun vnd zulassen hat nach Jrem pestn bedunken vor allmeniklich vngehind(er)t
Diese willkur vnd voreynigung haben Sie von baid(en) teilen gelobt vnd vorheissen vnansprochen stet vnd gancz zuhald(en) nw vnd in zukunfftigen zeitn des zuwarhait vnd be
stetignuss haben wir durch baid(er)teil fleissige gepete vnser Stat Insigl an diesen brief gehangen Geben am donerstag vor Thome ap(osto)li Anno d(omi)ni Mccccxl(mo)