Im Jar als man Zelt. Nach Christi vnnsers lieben Herrn, vnnd Seligmachers geburtt. 1.5.51. Ir. den Pfintztag nach Assumptio(n)is
Mariae. Ist geschehen ain volkumbliche vnnd guetwillige berednus, Zwischen der Eerwürdigen vnnd gaistlichen Jungfrawen Ludmilla
Äbtissin sambt Irem Conuentt Sanct Claren Ordens, bey vnser frawen. Aines, Vnnd dem Ersamen Weysen herrn, Burgrmaister, vnnd Rath
der Statt Znaym. Annders tails. Von Wegen der Colatur, vnnd verleihung der Pfarrkirchen, S(anct) Michaell daselbst zu Znaym. Also, nachdem
Obbemeltt Äbtissin sambt Irem Conuentt die Colatur, vnnd verleihung, Berüertter Pfarrkirchen, nach Inhallt vnnd vermüg der. Ro(mischen): Kay(serlichen): Matt(estät): p(ro)
Confirmirten Priuilegien vnnd freyhaiten Zuuor leihen gehabtt. Nun aber seither bey sich befunden, das Inen dieselbig kirchen, auch Pfarrhoff, So baide In
etlich Jaren in Merklich abfahl kumen, das sie die an Ier darleg, (Demnach sie kaines andern einkomens, dann Nur Sorgen vnnd Mühe daruon ge=
warttig.) Widerumb Zuepauen, vnnd Erheben, auch sonnst mit Pfarrherrn, vnnd Behmischen Predigern, Wie von alter her alda fürstlich Erhalten
Worden, Zuuorsehen vnmüeglich, das sie in Ansehung vnd betrachtung desselbigen mitt Irem lieben Rath. Demnach bemeltt Pfarr Inn der künig=
mark daselbst gelegen, freintlich vnnderredt gehaltten, vnnd sich dahin bewilligt. Inen anngeregtt Pfarr Colatur vnnd verleihung, Sambt al=
lem darzue gehörigem briefflichen Freyhaitten, vnnd begabungen Zuresigniern, vnnd vbergeben, doch mitt vorbehaltt. Damitt solches mit der
Ro(mischen): Kay(serlichen): Matt(estät): p(ro) Vnnsers aller gnedigsten Herrn, gnedigsten bewilligung fürgenomen werdt, vnnd beschehen, Daneben hatt Ir auch obbemeltt
Äbtissin, sambt Irem Conuentt dise Hernach geschriben Artickell außgenomen vnnd Vorbehaltten:
Ersthlich das Heüßl Im Hoff, soll mitt gättern gnuegsam Verwartt werden, das dem Closter kain schadt widerfahren mag, auch der grundt ohn
des Closters darlegen mitt der Maur erhalten werden. So weitt das Heüßl Inhaltt:
Der gartten wo Zuuor des Pfarrers Stadll gestannden, soll beym Closter bleiben:
Der Weingartt Zue Taßwitz ist mitt bewilligung des Rats auß den Weingärtten die von alter her gewesenn sein Inn die Statt
Znaym Vergintt worden, doch das man es Vmb den Zehent oder den Burgrmaister ansage:
Die Notturfft des Salz Zum Closter beuettlig. 2. fl. k(reuzer) hl(er) soll auch in die Statt Znaym nicht gehindertt Werden:
Das Weingärtl mitt dem Baumgärtthlin Im Bacz, soll auch beym Closter bleiben, vnnd kain Zehent daruon nicht gegeben Werden:
Das Weingärtl an der Wall, soll den Znaymer herrn haimbfallen nach lautt der verschreibung:
Des zu Vrkundt vnnd mehrer Sicherheit, Ist diser Contract vnd vergleichung, In Zwo gleich lauttenndt Schrifften gestelt vnnder baider
tail anhangenden Secret Insigillen Verferttigt, Vnd Jder parthey Ein geben Worden. Actum & Datum Znoymae, Anno, & Die ut supra: