Wir Katherina an der czeit Aptessin vnd der gancz Conuent des chlosters der Junchfrawn czu vnser frawn czu Znoym sand chlarn orde(n)
Bekennen offenleich mit dem brieff vor allen lewten die da yeczundt lebindig sind vnd dornach chü(n)fftig werden das fur vns chü(m)
men ist der beschaiden mann Thoman kawschar purger czu Znoym vnd hat fur vns gepracht vnd offenbar gezaigt einn offne vnuer=
serte hantfest mit vnsern aigen vnsern voruardern vorhafftigen anhangunden Jnsigeln die selbn hantfest lawt von wort czu wort
hernach in der gegenwurtigen hantfest also geschriben stet Jch Donka an der czeit aptessin vnd der gancz Conuent der Junchfrawn sand
Chlaren Orden czu Znoym dacz vnser frawn Tuen chundt an dem brieff allen lewten dy Jn sehent oder horent lesen dy nu lebent
vnd hernach chunfftig sint das wir mit wolnordachtem muet vnd rat vns vnseres Conuentes vnd chlasters pesserung willen
verchauft habn an hedwa ein lehen ackers an veld das weilen Goczens von hedwa gewest ist vleischen dem Walchrawicz vnd
frawn Peterschen vnd ir paider gerben vnd Nachkumling vmb acht vnd zwainczig mark grosser prager pfennig silbrein vier
vnd sechtzig gross fuer ein igleich mark czu raiten darumb wir vns pesser guet gekauft habn von Goczen einen Waingartn vmb
zwainczig mark grosser prager pfennig vnd habn Jm auff ein andern Waingarten achtzehen mark gelihen also das vleisch vnd
Petersch vnd ir gerben vnd Nachkumling an eim rechten purkrecht erb vnd purkrecht ackern ewikleich vnd ewikleiclich besiczen
vnd nuczen schullen versetzen verkauffen vnd verlaussen an ainn aigen geltantacz oder mit ein ander mit so ausgenume dacz sy vns
beschaidenhait das sew vns vnd vnserm chlaster alle Jar ewikhleich nicht mer czinsen schullen denn sechtzehenczig
pfennig auff sand michele tag vnd schullen furbas von vns vrei sein vnd mit chain sachen nicht mer czu schaffen habn noch mit der
chunicz stewr noch mit chain gab sy sei gross oder chlain recht oder vnrecht noch mit der hostat auff das haws noch mit der ge=
main vmb ain haller nicht leiden noch mit chain robot vnd mugen is in dem rechten versetzen verkauffen vnd verlaussen wem
sew wellen vnd daran nicht czu hindern Auch ist mer bedacht ab Jn das lehen yemant anfecht oder ansprach is machet oder gwalt
dar an tet das schulle wir Jn richtigt machen vnd var sein an alle ir mue vnd an allen Jren schaden vnd was sew des schade neme
vnd beweisen den schulle wir Jn ausrichten vnd widerkeren an alle arglist vnd das Jn das alles von vns vnd von dem chlaster
ewikhleich stet gehalden wer daruber geb wir Jn disen briff versigelt mit der aptessin vnd mit des Conuens Jnsigel czu einer
staten vrchund diser sach diser wandelung sint gezeugen Weichart der czauner richter czu Znoym vnd Jacob der Nagenczampf pur=
ger czu Znoym dy ir Jnsigel durch vnser pet willen an geczeugnuss an disen brieff gehangen habn czu vnsern Jnsigeln czu einer
offen gekhissen diser sach gegebn nach Cristes gepurd drewczehen hundert Jar in dem siben vnd funfczigistem Jar an der zwelf
tawsent Junchfrawn tag Nu haben wir daran angesehn des obgenanten Thoman kawschar vnd ander erber lewt vleissig ge=
pet durch der willen so vernew wir Jm vnd allen seinen gerben vnd Nachkumling begeben tichleich vnd bestatigen anderwaid
dy vorgeschribn hantfest mit allen Jren Rechten fraihung vnd gnaden in allen Jren artikeln vnd puncten als dy hantfest von
wort czu wort geschribn stet nichts ausgenumen vnd das Jn das alles von vns vnd von dem chlaster ewikleich stet gehal=
den wer daruber so geb wir Jn den brieff versigelt mit vnser der aptessin vnd mit des Conuens anhangunden Jnsigeln czu ein
staten vrchund diser sach der wandelung sint gezeugen die erbern weisen Peter plümel an der czeit purgermaister Jessl
von frewn vnd Jacob von hostomicz gesworn purger czu Znoym dy ir stat Jnsigel mit rechtem wissen durch vnser ge pet
willen an geczeugnuss an den brieff angehangen habn czu vnsern Jnsigeln czu ein offen gekhissen der vernewung der hantfest
Nach Cristi gepurd vierczehen hundert Jar vnd dornach in dem vierden Jar am eritag vor weinnachtten