Wir Endl polch Richte(r) Wenczlaw Czaun an der czeit purgm(a)ist(er) vnnd gancz Rat der Stat
czu Cznoym(m) tu(e)n chund vnnd bechennen offenleich mit disem prif allen leuten di in sehen oder
horen lesen daz ein chriegung gewest ist czwischen den gaistlichen vnnd andachtigen iunchfrawen
der Ebtissinn vnnd dem ganczen Conent czu vnns(er) frawen sant Claren orden
an ainem tayl vnnd den beschaiden iuden leser von p(r)imp(r)uncz abrahamen Schastlen vnnd der ganczen Ge=
main iuden der iuden an dem andern tayl von ain mauer di czwischen dem Clost(er) vnnd der iuden schul
ist gelegen Nu haben si an paiden tailn di sach vmb di mauer gesaczt an di weisen iuncz vnnd an von
hosarticz vnnd Engelprechten tolesund vnns(er) mitpurg(er) vnnd haben gelobt mit guetn treuen waz di gueten
vnns(er) mitpurg(er) daruber sprachen daz si daz gancz vnnd gar walten haltn vnnd darinder nicht tu(e)n nach reden
Nu haben di gueten vnns(er) mitpurg(er) durch paider tail pet willen di sach an sich genumen vnnd haben sich wol
derinnet von leuten den czu gelauben ist daz di mauer von alter gehort hat czu dem Clost(er) vnnd haben mit
wolbedachtem muet vnnd mit guetem rat also vber di sach ausg(e)sprochen von ersten daz di iuden mit irem gelt
sullen di mauer auffuren ob in murn vnnd sullen di mauer ewichleich mit irm gelt pessern als oft ez not
vnnd durft geschiht vnnd sullen auch daz wasser pey der mauer auffuren vnnd laiten an der Claren scha=
den Auch mag di Ebtissinn vnnd ir nachkumen an di selb mauer pauen waz in not vnnd durft wirt
vnnd daz sullen in di iuden nicht wern Auch sol di Ebtissinn vnnd ir nachkumen furpas ewichleich
von den iuden chain gelt noch czins mer vordern wann di sach gancz vnnd gar ist betraht mit vr=
chund dicz prifs versigelt mit vnserm anhangunden Ingsigl durch der gueten paider tail pet willen
der geben ist nach Cristi gepurd dreuczehenhundert iar darnach in dem Neunczigisten iar an dem mi=
tichen an vnns(er) frawen abent als si wart geporn