Ich Pernnhart von Leutendarff bekenn fuer mich vnd all mein Erben freündt vnd nachkumen offenlich mit disem brieff vnd tue kunth allermenniklich den er fuer kumbt die In sehen ho
ren ader lesen Das Ich wolbedachtlich Aus freyen willen vnd gueter vornunfft Auch nach rat gepornner Edler vnd gueter lewt vnd In der zeit das Ich das wolgetuen mocht Aus sun
der lieb vnd freuntschafft vnd vnwiderruefflich Dem Edeln vnd vesten Jan von Kladruwberz meinem lieben stieffvater vnd allen seinen Erben freünden vnd nachkumen geschafft gefuegt ge
macht geben vnd vorschriben hab schaff fueg mach vnd gib auch vorschreib wissentlich In krafft des brieffs alle die Erb stück gult vnd gueter die mich weiland von herren Pernnhar
ten des ffloiten seligen Elichen vnd leiblich gelossen Tochter der Erendvesten Edeln frawen Czimpurcken meiner lieben Mueter vnd fraw Margreten vnd fraw Barbara Iren leiblichen schwe
stern den got genadig sey an mich erblich angestorben vnd kumen sein Wie die genantt vnd wo die gelegen sein es sein hewser vesten lehen lewt dorffer phenning gult grundt poden
Äcker wald wismat gartn holczer Teicht wern vnd Traid Czehend Perckrecht Weingarten gelt schuld schuldbrueff sagbrieff widerffallbrieff auffligend ader farund guet Wie die ge
nantt mochten sein So mir von den beruerten Erendvesten ffrawen Czimpurcken weiland herren Pernnharten ffloyten saligen Elichen Tochter mein liebe Mueter vnd fraw Marga
reth vnd fraw Barbara Iren elichen vnd leiblichen schwestern den got genadig sey erblich Angestorben vnd her erbt hab geteilt halbe In ewigen zeiten Wo vnd wie sy die hie vnnd
hinder In gelassen haben mit aller Iren Eren wirden nutzen vnd Rechten Wie vnd ye mein vorbenannte Mueter vnd Ire schwestern selig die er Erbt Innegehalten gepraucht genuzt
vnd genossen haben wo vnd wie die genantt gelegen genantt ader gescheczt sein pey meinem vnd meiner erben freunden vnd nachkumen leubtagen leyb erfordern einnemen
Innhaben gefuerten geprauchen nutzen geniessen vnd allen Iren frummen lediklichen da mit handeln vnd tuen verkauffen versetzen schaffen machen ader geben wem sy wellen
vnd wie sy vorlust an mein vnd all meiner Erben vnd freündt nachkumen vnd menigklichen von vnsern wegen Irrung hindernuss vnd widersprechen Ich wil auch des offtge
dachten Jan von Kladruwberz meinem lieben stieffvater vnd allen seinen Erben fuer mich vnd all mein Erben gewer schirm vnd furstandt sein mit krafft des brieffs wo vnd wie offt
sein des nott tuen wirdt Wie vnd In lannd In Osterreich gewonheit vnd recht ist trewlich vnd vngeuerlich Auch bekenn Ich beruerter Pernnhart von Leutendarff fuer mich vnd
all mein Erben freündt vnd nachkummen Das Ich mit wolbedachtem muet Auß freyen willen vnd gueter lewt rat Auch aus sunder lieb vnd freuntschafft ist das Ich beruerter Pern
hart von Leutendarff vor dem mergedachten Edeln vnd vesten Jan von Kladruwberz meinem lieben stieffvater mit tod voryend do got lang vor sey vnd nicht leiblich elich vnd manlich
erben hinder mein enließ Daß Ihm sein so gib vnd schaff Ich Auch vnwiderruefflich vnd aus sunder lieb vnd freuntschafft dem vorgestimbtem Jan von Kladruwberz meinem lieben
stieffvater vnd allen seinen Erben freunten vnd nachkummen den annderen meinen halbentayl der selbigen stuck vnd gueter die mir von der mergedachten Erendvesten Edeln
frawen Czimpurcken vnd fraw Margareten vnd fraw Barbara Iren schwestern erblich Angestorben vnd er erbt hab Auch mit Allen den Eren nutzen runten vnd In gehorung
wie vnd so die verz gemelt fraw Czimpurck vnd Ir schwestern seligen vnd Ich die er erbt Innegehalten gepraucht genuzt vnd genossen haben nichtz außgenomen Er mag vnd schol
auch Er Ich nicht Elich Sün hinder mein ließ die nach meinem tod Oder wer den brieff mit seinen gueten willen In hat einnemen nutzen vnd geniessen die verkauffen versetzen
schaffen machen geben Wem er wil Inallerdermas wie vor vmb den anndern halbentayl diser gueter andem brieff mit allen punthen vnd articlen geschriben stet an mein vnd
meiner erben freündt vnd nachkummen vnd menigklichen irrung vnd hindernuss Auch widersprechung So aber Ich meer benanter Pernnhart von Leutendarff ader mein
Erben freündt vnd nachkummen ader yemand von vnsern wegen wider die gegenwirtig vorschreibung Als an dem brieff mit aigen worten vnnd articlen begriffen ist Icht tu
ten mit Recht ader anrecht vnd das der offt bestimbter Jan von Kladruwberz mein lieber stieffvater ader sein Erben freündt vnd nach kummen da durch sy schaden nemen Wie der schad
genantt wirdt den selbigen schaden gelob wir In pey vnnsern trewen gannczleich Abtragen vnd widerkern sy sollen auch den selbigen schaden zu vns vnd allem vnnsern guet
haben vnd bekummen es sein erbgult vnd gueter ader varund guet wo vnd In was lannd wir das haben ader gewunnen do von soll sein vmb den schaden yeder lanndtsfurst Oder
sein Anwaldt gewern vnd bezaln an vnnsern Erben freündt vnd nachkummen vnd menigklicher Irrung vnd wider red Vor sein lebendig oder todt Des zu ayner waren vrkundt
gib Ich obgenantter Pernnhart von Leutendarff fuer mich vnd all mein Erben freündt vnd nachkummen dem obgenannten Jan von Kladruwberz meinem lieben stieffvater Im
vnd seinen Erben den brieff besigelt mit meinem Aigen anhangenden In Sigel darvnder Ich mich mit meinen trewen vorpindt Alles das was vnd stut zu halten so bevor an dem
brieff geschriben stet trewlich vnd vngeuerlich der sachen halben sein geczeugen durch meiner vleissigen gebet willen Die Wolgebornn herren herren Wok von Rosembergk
herre Jan von Schwanbergk vnd auf Snalomiz des ordens der Ritterschafft des heiligen sanndt Johanns tauffer gotis des seligen spitelhawsse Jherosolimithan der Armen gotis
diener Gemainer Meister In Behem Merhern Slesien Polan Osterreich Steyer kerindten vnd krain vnd herren Wilhalm von Risenmbergk vnd auf wilharticz vnd herren Burian
von Schwanbergk die zeit hawbtman zu Klatlyne Auch die Edeln vnd vesten geporen herren Jan von klenaw vnd wolff von Janowicz vnd auf Risembergk Jan Tlura von
wrabic auf Lzmelicz hainreich kocz von Dobess das sy auch Ire In Sigel an den brieff angehangen haben doch In vnd Iren Erben an schaden Geben zu Strakomiz nach Cristi
gepurt Tawsent vierhundert Jar Dar Nach In dem siben vnd Achtzigistem Jar am Sambstag noch sanndt veitz tag des heiligen Martrers