Nos Antonius Dei gra(tia) Archiepiscopus Pragen(sis) S(anc)tæ Sedis Ap(osto)licæ Legatus, Ordinis Cruciferorum cum rubea
Stella per Bohemiam, Moraviam, Sylesiam ac Poloniam Magister Generalis (et)c(etera). Vniversis et singulis præsentes n(ost)ras l(itte)ras
inspecturis Salutem in D(omi)no. Notumq(ue) facimus, quòd vacante Præpositura in monte S(ancti) Hypoliti propè Znoymam, quæ ordinis est nostri
Cruciferorum, per obitum R(everen)di f(rat)ris Andreæ Storky ultimi et immediati eiusdem Præposituræ possessoris, de fidelitate, industria, et
circumspectione Venerabilis devoti nobis dilecti D(omi)ni Martini Muglicen(sis) sufficienter informati, attento quòd huiusmodi institutio
et confirmatio, ab antiqua et approbata consuetudine pleno Jure ad nos pertineat: eundem D(omi)num Martinum omni meliore modo,
via, Jure, causa et forma, quibus meliùs, validiùs, et efficaciùs potuimus, et debuimus, possumus, et debemus, constituimus, creamus,
ordinamus, et confirmamus nostrum, et præfati n(ost)ri ordinis, verum, certum, legitimum, et indubitatum Præpositum dictæ Præpo=
situræ S(anc)ti Hypoliti, eamq(ue) prænominato D(omi)no Martino cum omnibus f(rat)ribus, Juribus, et pertinentijs suis tenendam, gubernanda(m)
et possidendam authoritate n(ost)ra tenore p(ræse)ntium conferimus, committimus, et assignamus, eumq(ue) in Præpositum, gubernatorem, et re=
ctorem ipsius cum omnibus Juribus et pertinentijs suis, eodem tenore instituimus, et illam ei concedimus per p(ræse)ntes has n(ost)ras l(itte)ras.
Sub hac tamen conditione ut ex præscripto regulæ S(anc)ti Augustini vivat, et annuatim Hospitali n(ost)ro S(anc)ti Francisci propè pontem
Pragen(sem) Sexaginta urnas vini secundum consuetudinem veterem et usitatam persolvat, præstito per eum Juramento quòd
Præposituram benè et utilit(er) reget, et condecenter administrabit, terras, ædificia, et possessiones, atq(ue) Jura alia ipsius Præposituræ
manutenebit. Reservantes nobis in omnem eventum Jus visitandi, et omnia Jura generali Magistro competentia. In
cuius rei testimonium has l(itte)ras manu n(ost)ra subscripsimus, Sigilliq(ue) n(ost)ri appensione iussimus communiri. Dat(um) ex Cast(ro)
Archiep(iscop)ali n(ost)ræ Residentiæ, die vj(a) mensis Octob(ris) Anno D(omi)ni Millesimo, Quingentesimo, Septuagesimo Septimo.
Antonius
C(ommissio) a(d) m(andatum) D(omini) a(rchiepiscopi) ~Malab~