ANTONIUS JACOBUS SUCHANECK,
Sacri Militaris Ordinis Crucigerorum cum Rubea Stella per Bohemiam, Hungariam, Austriam, Moraviam, Silesiam, et Poloniam Generalis, ac Magnus
Magister, Inclyti Regni Bohemiæ Prælatus Infulatus, nec non Inclyti Provincialis Præfectus, et Suprema Regni Rectificationis, atque Tributi
hæreditarij, et aliarum Commissionum Aulicarum Assessor,
Reverendissimo in Christo Nobis Sincere Dilecto Domino Wenceslao Friderico Hlava, Sacri Militaris Ordinis nostri Praga
Professo, et in S. Monte Culmensi B. V. Mariæ Thaumaturgæ Præposito
Salutem in Domino.
Præclara Vitæ, morumque honestas, litterarum eximia peritia, singularis in agendis prudentia, insignis in Deum, ac Ejus cultum promovendum fervor, pietas
conspicua, salutis animarum zelus, fervens in nunciando Verbo divino facundia, atque in perfungendis munijs dexteritas, et fidelitas, reliquaque laudabilia specimina, quibus a
Sacra Religiosa Professione in Cura animarum diversis in stationibus per annos complures qua Capellanus primum Schlaggenwaldæ, Cubiti, atque in Commenda Pontensi Cooperator, demum
per Annos Octo qua Curatus in Schaab, postremo autem per Annos sedecim qua Præpositus in S. Monte Culmensi te præ reliquis te conspicuum reddidisti, et quibus etiam deinceps,
prout in Domino confidimus, pro S. Ordinis nostri bono, et honore magis adhuc te reddes conspicuum; merito nos inducunt, ad favores uberiores tibi exhibendos. Præmissorum itaque
omnium intuitu matura cum deliberatione, et de certa scientia nostra, adhibitoque Consultorum nostrorum consilio tibi Wenceslao Friderico Hlava Sac. Militaris Ordinis nostri Confratri
tanquam personæ dignæ, et de eodem S. Ordine nostro perquam bene meritæ Præposituram Infulatam in Monte S. Hippolyti ad Regiam Civitatem Znoymensem cis Tayam in Marchio
natu Moraviæ sitam per obitum pie defuncti Reverendissimi Domini Procopij Burchart immediati ac ultimi Possessoris ejus legitime vacantem, cujus collatio, nominatio, et institutio de
probata antiquissima consuetudine ad Nos Generalem et Magnum Magistrum pleno jure spectare dignoscitur, cum omnibus, et singulis appertinentijs, et earum fructibus, Juribus, Privilegijs,
ac prærogativis absque ulla diminutione, prout alij ejusmodi Præpositi eam tenuerunt, et possederunt, Authoritate nostra hac in parte Ordinaria præsentium tenore possidendam, et tenendam
concedimus, et conferimus, teque in verum, legitimum, ac indubitatum in dicto Monte S. Hippolyti Præpositum omni meliori modo, Via, jure, causa, et forma, quibus melius, validius, et efficacius
potuimus, debuimus, possumus, et debemus, nominamus, instituimus, et investimus, ac ita nominatum, institutum, et investitum præsentibus declaramus, et confirmamus: Dantes tibi omne jus, et
potestatem alias huic Præposituræ tuæ quocunque modo competentem, volentes, ut te ex nunc, et futuris temporibus tanquam Præpositum a Sacratissima Cæs. Reg. Apost. Majestate utpote actualiter
gloriosissime Regnante Hæreditario Bohemiæ Rege, et Marchione Moraviæ Domino Domino nostro Clementissimo, quoad temporalia Eidem Præposituræ annexa jamjam confirmatum geras, scribas
que, Signeto Præposituræ utaris, atque locum, et Sessionem in Capitulis Generalibus, et alijs Conventionibus inter Confratres habeas ab ævito tempore huic iterato dictæ tuæ Præposituræ convenientem:
Mandantes omnibus, et singulis, curæ tuæ commissis, ut te pro vero, et legitimo Præposito suo recognoscant, habeant, et revereantur, tibique in omnibus, et per omnia pareant, ac obediant; Appromit
tentes tibi contra quoscunque inobedientes, contumaces, aut refractarios auxilium nostrum, et assistentiam: Omnibus, et singulis insuper S. Ordinis nostri Confratribus præcipientes, ut te pro tali æstiment, et
agnoscant; Hac tamen conditione, ac lege, ut prævie nobis, prout juris, ac moris est, juramentum præstes, Superiori tuo immediato Mihi Generali et Magno Magistro, nec non nostris legitimis
Successoribus obedientiam, fidelitatemque spondeas, quod Præposituram hanc bene, et utiliter reges, et fideliter administrabis; agros, Sylvas, ædificia, Possessiones, Privilegia, atque alia jura omnia
ipsius Præposituræ manutuebis, et pro posse defendes, nihilque, quod ad præfatam Præposituram pertinet, alienabis, oppignorabis, commutabis, aut debitis gravabis, sed potius alienata, distracta, aut oppignora
ta ad jus et proprietatem ejusdem Præposituræ reduces, vel reduci, et restaurari pro viribus tuis curabis. Denique uti Parochiæ, et Ecclesiæ Hodnicensis, atque aliarum Ecclesiarum administrationem
de Arbitrio nostro per Confratres Ordinis nostri debite providebis, ita etiam pro pauperum debita conservatione, nec non de avita fundatione, ac consuetudine Hospitali Prageno præstari solita diligen
ter pariter præstabis, et præstari facies. Reservantes Una Nobis, nostrisque Successoribus per expressum Jus visitandi, corrigendi, aliaque omnia, quæ de jure, vel consuetudine Generali,
et Magno Magistro competere dignoscuntur. In quorum omnium fidem, et plenissimum Robur has nostras Litteras manu propria subscriptas dedimus, et majoris Sigilli nostri appensione
scienter communiri, ac expediri fecimus. Pragæ in Ædibus Generalatus, et Magni Magisterij nostri ad pedem Pontis die 27. Mensis Septembris Anno Incarnationis Domini Millesimo
Septingentesimo Octogesimo Quarto.
Antonius Suchanek
Generalis et Magnus Magister
Franciscus Josephus Titlbach
Secretarius