Christianus Pittroff
Crucigerorum Cum Rubea Stella per Bohemiam, Moraviam, Austriam, Silesiam, Poloniam et
Hungariam Magnus Magister, Inclyti Regni Bohemiae Praelatus Infulatus, S.S. Theologiae in Alma ac
Antiquissima Universitate Carolo-Ferdinandaea Doctor etc. etc.
Religioso in Christo Nobis Dilecto Fratri Joanni Grabner Sacri Militaris Ordinis Nostri Pragae Professo, Commendatori ac Parocho Pontensi, Reverendissimi
ac Celsissimi Principis Archiepiscopi Viennensis Consistorii ~Clementis~ Consiliario Salutem in Domino!
Praeclara vitae morumque honestas, quam a momento Sacrae Professionis Tuae a quadraginta nempe annis in Ordine nostro assidue comprobasti, servitia saluberrima, quae eidem qua Theologiae Correpetitor, Sacrista, Concionator, Catecheta,
Parochus, Commendator et Agens Causarum Ordinis tam in domesticis, quam publicis rebus pari fidelitate ac dexteritate praestitisti, Encomia tam excelsi Regiminis et Reverendissimi Consistorii, quam Aulicarum Commissionum toties promerita, insignis
honor Celsissimi Principis Archiepiscopi Viennensis in Te per nominationem in Consistorii Sui Consiliarium collatus, pietas in Deum, amor Ordinis, charitas erga fratres, qua Tibi animos et aestimationem omnium conciliaverunt: haec, inquam, specimina, quibus
Te hactenus conspicuum reddidisti, et quibus etiam deinceps, prout in Domino confidimus, pro S. Ordinis nostri bono et honore, magis conspicuum reddes, merito Nos inducunt ad favores uberiores Tibi exhibendos. Quare praemissorum omnium intuitu,
matura cum deliberatione et de certa scientia nostra, adhibitoque Consiliorum Nostrorum consilio Tibi Antonio Joanni Grabner S. militaris Ordinis nostri Confratri, tanquam personae digne, discretae et de eodem S. Ordine nostro optime meritae Commendam cum Hospitali
S. Spiritus, et Ecclesia Parochiali sub Patrocinio S. Bartholomaei Apostoli in civitate Egra sitam, quae per Electionem Nostram in Generalem Magnum Magistrum tanquam immediati et ultimi Possessoris sui vacare, et cujus Collatio ad Nos privative spectare dignoscitur,
omni meliori modo, via, jure, causa et forma, quibus melius, validius efficaciusque possumus ac debemus, praesentium tenore possidendam ac tenendam concedimus et conferimus, Teque in verum, legitimum et indubitatum praememoratae Parochialis Commendae
et Hospitalis Commendatorem nominamus, constituimus, praeficimus, atque sic nominatum et constitutum declaramus, investimus et confirmamus: dantes Tibi in Spiritualibus et Temporalibus Potestatem omnimodam de jure vel consuetudine
huic Commendae annexam et competentem, mandantes omnibus Curae Tuae Commissis, ut Te pro vero et legitimo Commendatore Suo recognoscant, habeant ac revereantur, Tibique in omnibus et per omnia pareant ac obediant, apponitentes
Tibi contra quoscunque inobedientes, contumaces aut refractarios auxilium et assistentiam nunquam defutura: concedentes Tibi praeterea jus et facultatem, ut Te ex nunc et futuris semper temporibus ut Commendatorem talem geras et scribas,
Locum et Sessionem in Capitulis Generalibus et aliis Conventionibus inter Confratres immediatum habeas post Praepositum Pöltenbergensem, et omnia ea jura, ac praerogativas in Ordine Nostro capias, quae huic Commendae Tuae annexa sunt.
Omnibus ac Singulis Sacri militaris Ordinis nostri Confratribus insuper praecipientes, ut Te pro tali habeant, agnoscant et aestiment; hac tamen conditione ac lege, ut praevie Nobis, prout juris ac moris est, praemissa
juxta S.S. Concilii Tridentini Constitutiones Professione Romano Catholicae Fidei, corporale Juramentum ad manus Nostras praestes, quod Nobis legitimo Generali Magno Magistro et Superiori Tuo immediato
Nostrisque etiam legitimis Superioribus fidelis et obediens eris, Residentiam debitam observabis, Inventaria debite conficies et Nobis transmittes, Archivium et ad illud pertinentes Libros
Extractuum, per Incendium e suo Ordine et loco evulsa in competentem statum redigas, Jura pariter, Possessiones et Privilegia ad saepe dictam Commendam pertinentia pro posse manutenebis et defendes,
nec non et Jura Subditorum, tum Bayreuthensium, nunc Bavarorum, cum per districtum Egrensem sitorum adversus quamlibet vim et subreptionem pro adjunctis temporum et circumstantiarum
quemadmodum a quinque Saeculis abhinc laudabiliter factum est et a piissimis Antecessoribus omni conatu observatum, tuearis et protegas et praeserves, eandem etiam Commendam ante
biennium incendio deletam, sed maxima ex parte Curis et Sumptibus Nostris jam restauratam pro viribus integram restitues ac in sartis tectis conservabis, nulla debita passiva citra licentiam in scriptis obtentam
contrahes, nihil alienabis, distrahes aut oppignorabis, sed, si qua alienata vel distracta reperta fuerint, ad jus et proprietatem Ejusdem Commendae reduces, et reduci pro viribus Tuis curabis. Insuper ea omnia,
quae in ultimo Capitulo Generali constituta ac decreta sunt, exacte observabis. Conferimus Tibi praeterea ob perspectam Tuam prudentiam et in rebus gerendis dexteritatem pro praerogativa Commendae Egrensis jam ab
Antecessoribus Nostris saepe honorata Jus delegatum Inspectionis super universas Stationes Ordinis Nostri per Circulum Cubitensem Tachovium usque sitas, vi cujus minora negotia tum personalia cum realia nomine Nostro
componas, praesertim ea, quae moram non patiuntur, provisorie sistas, cum tempore Nobis indicanda; quae vero majora, cum instructione causae ad Nos referas, Tuo judicio deinde post decisionem capotam executioni
demandanda; cumprimis ea, quae a Capitulo Generali novissimo pro rebus et personis Fratrum salvis praestandis constituta sunt. Reservantes una Nobis Nostrisque Successoribus pro expresseum jus visitandi, corrigendi,
aliaque omnia, quae de jure vel consuetudine Generali Magno Magistro competere dignoscuntur. In quorum omnium fidem ac potissimum robur has nostras litteras manu propria subscripsimus et Majoris Sigilli
Nostri appensione scienter muniri et expediri jussimus.
Pragae in Aedibus Generalatus et Magni Magisterii Nostri die 7ma Mensis Februarii Anno Millesimo Octingentesimo Undecimo.
Franciscus Christianus Pittroff
Militaris Ordinis nostri Generalis
Magnus Magister m(anu) p(ropria)
Josephus Köhler Secretarius m(anu) p(ropria)