Salutem in Domino!
Praeclara vitae religiosae tuae honestas morumque integritas, indefessi in cura animarum pro Dei Gloria et S. Ordinis Nostri honore exantlati labores, probata in administrandis bonis temporalibus fidelitas atque dexteritas, singularis pietas nec non sincerus erga
Ordinem amor, aliaque laudabilia specimina, quibus a S. Professione tua diversis in stationibus et primum quidem per octodecim annos qua Capellanus Regiomonti et Egrae, dein per annos quatuor qua Decanus Cubitensis, per annos tres qua Prior Nostri
Conventus pragensis, per annos quatuor qua Praepositus ad B. Mariam Virginem Thaumaturgam in monte Culm, postremo per tres fere annos qua Commendator ad S. Wenceslaum in civitate Pontensi Te prae reliquis conspicuum reddidisti, et
quibus etiam deinceps, prout in Domino confidimus, pro S. Ordinis Nostri bono et honore magis adhuc te reddes conspicuum, merito Nos inducunt ad favores uberiores Tibi exhibendos.
Quare praemissorum omnium intuitu, matura cum deliberatione et de certa scientia Nostra, adhibitoque Consultorum Nostrorum consilio Tibi Emanueli Fronth S. militaris Ordinis Nostri Confratri, tanquam personae dignae et de eodem S. Ordine Nostro
bene meritae Praeposituram Infulatam in monte S. Hippoliti ad regiam civitatem Znoymensem cis Tajam in Marchionatu Moraviae sitam, per obitum pie defuncti Reverendissimi Domini Floriani Lang immediati ac ultimi possessoris ejus legitime
vacantem, cujus collatio, nominatio et institutio ad Nos Generalem et Magnum Magistrum pleno jure spectare dignoscitur, cum omnibus et singulis appertinentiis et earum fructibus, juribus, privilegiis ac praerogativis absque ulla diminutione, prout alii ejusmodi Prae
positi eam tenuerunt et possederunt, praesentium tenore possidendam et tenendam concedimus et conferimus, teque in verum, legitimum ac indubitatum in dicto monte S. Hippoliti Praepositum omni meliori modo, via, jure, causa et forma, quibus melius,
validius et efficacius potuimus, nominamus, instituimus et investimus, ac ita nominatum, institutum et investitum praesentibus declaramus et confirmamus: dantes tibi omne jus et potestatem alias huic Praepositurae quocunque modo competentem volentes, ut, exorata
Suae Sacratissimae Caes. Reg. Apostolicae Majestatis haereditarii Regis Bohemiae et Marchionatus Moraviae Domini Domini Nostri Clementissimi Ferdinandi Primi Confirmatione, te ut talem Praepositum geras
scribasque, sigillo Praepositurae utaris, atque locum et sessionem in Capitulis Generalibus et aliis conventionibus inter Confratres habeas ab avito tempore huic dictae tuae Praepositurae convenientem, immediatam nempe post Supremum Ordinis Caput Generalem
ac Magnum Magistrum, mandantes omnibus et singulis curae tuae commissis, ut te pro vero et legitimo Praeposito suo recognoscant, habeant et revereantur, tibique in omnibus et per omnia pareant ac obediant, appromittentes tibi contra quoscunque inobedien
tes, contumaces aut refractarios auxilium nostrum et adsistentiam: Omnibus insuper et singulis S. Ordinis Nostri Confratribus praecipientes, ut te pro tali aestiment et agnoscant, hac tamen conditione ac lege, ut praevie Nobis, prout juris et moris est, jura
mentum praestes, quod uti alias, ita deinceps Nobis legitimo Generali Magno Magistro et Superiori immediato tuo Nostrisque etiam legitimis Successoribus fidelis et obediens eris, Praeposituram hanc bene et utiliter reges et fideliter administra
bis, agros, silvas, aedificia, possessiones, Privilegia, atque alia jura omnia ipsius Praepositurae manutenebis et pro posse defendes, nihilque, quod ad praefatam Praeposituram pertinet, alienabis, oppignorabis, commutabis aut debitis gravabis, sed
potius alienata, distracta aut oppignorata ad jus et proprietatem ejusdem Praepositurae reduces vel reduci et restaurari pro viribus tuis curabis, Inventaria debite confecta, uti ratiocinia annua in ordinem reducta Nobis transmittes, hospitalia Praepositurae paterne reges, quaeque vi funda
tionis aut ex voluntate Ordinis aut ex charitate fraterna domui maternae praestanda sunt, fideliter praestabis; reservantes una Nobis Nostrisque Successoribus per expressum jus visitandi, corrigendi, aliaque omnia, quae de jure vel consuetudine Generali et Magno
Magistro competere dignoscuntur.
In quorum omnium fidem et plenissimum robur has Nostras literas manu propria subscriptas dedimus et Majoris Sigilli Nostri appensione scienter communiri ac expediri jussimus.
Pragae in Aedibus Generalatus et Magni Magisterii Nostri ad pedem Pontis die 15 Mensis Julii Anno Millesimo Octingentesimo trigesimo Septimo.
Josephus Antonius Köhler
Generalis ac Mag. Magister.