SALUTEM IN DOMINO!
Eximia vitae morumque honestas, praeclara religiosae disciplinae observantia, pietas in Deum, amor Ordinis, fidelis propensio ac prompta voluntati Superioris obedientia, nec non sincerae et fraternae charitatis ac pacis studium,
haec inquam et alia merita, quibus Te diversissimis in rerum ac locorum circumstantiis per longam annorum seriem conspicuum reddidisti, nec minori studio, prout in Domino confidimus, etiam deinceps pro sacri Ordinis
Nostri bono et honore conspicuum reddes, Nos inducunt, ut specialem Tibi favorem exhibeamus.
Quare praemissorum omnium intuitu, matura cum deliberatione et de certa scientia Nostra adhibitoque Consultorum Nostrorum consilio Tibi, sacri militaris Ordinis Nostri Confratri, tamquam personae dignae et de eodem
Ordine Nostro meritae Praeposituram parochialem in Monte Sti Hippolyti quae per obitum Ampl(issimi) et Rev(erendissi)mi D(omi)ni Praep(ositi) I(oannis) Würl vacare, cujusque collatio ad Nos qua
Generalem ac Magnum Magistrum spectare dignoscitur, omni meliori modo, via, jure, causa et forma, quibus melius, validius, efficaciusque potuimus et possumus, praesentium tenore possidendam et tenendam concedimus et confe-
rimus, Teque in verum, legitimum et indubitatum praememoratae Praepositurae et Hospitalis in Monte Sti Hippolyti nominamus, constituimus, praeficimus, atque ita nominatum et constitutum declaramus, investimus
et confirmamus, dantes Tibi in spiritualibus et temporalibus potestatem omnimodam de jure vel consuetudine huic Praepositurae annexam et competentem; mandantes omnibus curae Tuae commissis, ut Te pro vero et legitimo
Praeposito suo cognoscant, habeant et revereantur, Tibique in omnibus et per omnia pareant ac obediant, appromittentes Tibi contra quoscunque inobedientes, contumaces et refractarios auxilium Nostrum et assistentiam
Nostram semper adfuturam; concedentes Tibi praeterea jus et facultatem, qua Te ex nunc et futuris semper temporibus ut Praepositum talem geras et scribas, locum et sessionem in Capitulis Generalibus et aliis Con-
ventionibus inter Confratres immediate habeas post ante omnes reliquos Commendatores et omnia ea jura praerogativasque in Ordine Nostro capias, quae huic Praepositurae Tuae annexa sunt; omnibus
insuper ac singulis sac(ri) mil(itaris) Ordinis Nostri Confratribus praecipientes, ut Te pro tali Praeposito habeant, agnoscant et aestiment, hac tamen conditione ac lege, ut praevie Nobis, prout juris ac moris est, praemissa
juxta SS. Concilii Tridentini constitutionem Professione Romano-Catholicae fidei corporale juramentum ad manus Nostras praestes, quod uti hucusque ita deinceps Nobis legitimo Generali ac Magno Magistro et Superiori Tuo imme-
diato, Nostrisque etiam legitimis Successoribus fidelis et obediens eris, residentiam debitam observabis, Inventaria debite conficies et Nobis transmittes, Archivium et ad illud pertinentes libros extractuum sollicite asservabis, jura
pariter, possessiones et privilegia ad saepe dictam Praeposituram pertinentia pro posse manutenebis et defendes, nihil ab ea alienabis, distrahes aut oppignorabis, sed si quae alienata aut distracta reperta fuerint, ad jus et
proprietatem ejusdem Praepositurae reduces aut reduci pro viribus Tuis curabis, nulla debita passiva citra licentiam et expressum in litteris obtentum Ordinis consensum contrahes, sarta tecta conservabis et ratiocinia Nobis
quotannis ispicienda propones: Insuper ea omnia, quae in Capitulis Generalibus constituta et decreta sunt, exacte observabis, reservantes una Nobis Nostrisque Successoribus per expressum jus visitandi, corrigendi aliaque omnia, quae
de jure vel consuetudine Generali ac Magno Magistro competere dignoscuntur.
In quorum omnium fidem et plenissimum robur has Nostras litteras manu propria subscripsimus et sigillo Nostro scienter muniri et expediri jussimus.