Ich prueder Gregorius dy czeit Custos der prued(er) in mahern vnd Ich prued(er) Thomas dy czeit Gardian prued(er) Simon vicegardian
vnd Sacristan der gancz Conuent vnser liebnfrawen Closter czu der Yglaw der Minornprued(er) orden bekennen offenlich mitt dysem
prieff das vns dy Erber wolgelert fraw Margaretha fuxsin mitt wolbedachter muet vnd guett(er) v(er)nunfft czu der czeit so sy das wol
gethun mochte ein Almuesen pracht vnd geben hatt als vil als Seczick vnger(ische) guld(en) vnd das selbig Almuesen sy eingelegt vnd
beuolhen hatt denn Erbern weysen Wenczlab partheint vnd Niclas Gayssler Purg(er) vnd dyczeit kyrchenvat(er) vnsers gotthauss vmb
welichs almuesen vns dy emeltn czwey hern kauffen schollen ein anligundes Eungs Guett darumb wyr obgemelt prueder an statt
vnser vnser(er) nochkemen czu einer besundern widerlegung gegen Gott dem almechtign vmb solich guetthait vnd noch begyr der ob
gemeltn frawen vbervns nemen vnd vpflichtn mitt dyser vrkhund czu hallen vnd czu vpringen allew wochen czwo Seelmess auff der
heyligen zwelfpottn altar vnd darnoch so dy obgemelt fraw Margaretha mitt todt abgeet Jarlich ein Ewigen Jartag mitt dreyen
lecten vigilig vnd ambt der heyligen mess als gewonheit czu thuen ist fur dy totten Vnd so wir ader vnser nochkemen in solichem noch
lassig warn da Gott vor sey vnd solich gotzdienst nicht vpriestn so scholln dy kyrchenvat(er) denn der prieff beuolhn ist solichs so von
dem kaufften Guett gefelt In Irn namen vnd czu der kyrchen notturfft anlegen also lanng bincz das pesser(er) ad(er) volpracht wirt nach
dyser vnser(er) v(er)schraybung Geben czu der Yglaw an der heyligen Junnckfrawen Praxedistag In dem M(illesimo) cccc(esimo) vnd lxxxvij Jare
vnder vnsern obgeschribn des Custos Gardian vnd des Conuents anhanngunden Ingsigeln