Ich frowe Juttka vo(n) Warsfowicz tu(n) cze wissen vnd chund alle(n) den di disen offen p(ri)f sehent od(er) ho(re)nt lesen, daz Jch vnd mein swest(er) kind
mit vordacht(e) mut vnd mit mein(er) vreunt rat Becht vnd redleich chauft hab, cze rechtem erbe, czway Lehen cze dem pehmischen
Paratucz Auf den selbe(n) czwain Lehe(n) czwo m(a)r(c)k gelt rechtes cins Dem Ersame(n) man Benessche d(er) auch ist da gesessen in de(m) selben dorf
cze Paratucz vn(d) sein(er) Hausvroue(n) vn(d) seine(n) erben, v(m)b Vier vnd czwainczig m(a)r(c)k g(u)tt(er) p(ra)g(er) phenneg ain vnd sechczig f(ur) ain m(a)r(c)k cze
raite(n) mit allem nutz vnd mit aller herschaft recht alz ichs vn(d) mein swest(er) kind gehabt han cze Veld vnd cze dorf, Dar ub(er) cze ain(er)
pess(er)n vrchu(n)d vn(d) gewissheit diss sache bit ich cze mir vorgenante(n) vrou(e)n Juttka vo(n) Warsfowicz vn(d) mein(er) swest(er) kind(er) meine(n) Ochem Wil
halmen vo(n) Nikelwicz vn(d) meine(n) Ochem Holaczen auch vo(n) Nikelwicz vn(d) Jeschken Steinssecz di cze mir vn(d) cze mein(er) swest(er) kind(er)
gelubt mit ire(n) treuwen vn(d) mit gesampte(r) hant vnd Jurgel weis gege(n) dem vorgenante(n) man Benessche vo(n) Paratucz vn(d) sein(er) Hausvro
uwen vn(d) seine(n) erbe(n) v(m)b daz vorgenant gut v(m)b di czway Lehe(n) cze de(m) bemische(n) Paratucz cze schirm(en) vn(d) cze vrein recht alz lant recht ist
Vnd sw(er) wir vorgenante(n) daz vorgenat gut nicht mochte(n) vrein noch entweren recht alz lant recht ist So gelube(n) wir vorgenante(n)
daz bei vns(er)n treuw(en) vn(d) mit gesampte(r) hant welchen Aing auf den vorgeschribe(n) d(er) vorgenat Beness vo(n) Paratucz vn(d) sein Hausvroue od(er) sein
erbe(n) od(er) w(er) dise(n) p(ri)f hiet mant vnd nemet v(m)b haisse laiste vn(d) inlege d(er) selb d(er) gelubt daz mit sein(er) treuen daz er schol laiste(n) vnd in
varen cze Budywan in de(m) m(a)r(c)kt mit aim chnecht vn(d) mit czwain pfer(den) wo hin im von in wirt beweyset ein herb(er)g od(er) ein gasthaus
da selbst in dem m(a)r(c)kt vn(d) laiste(n) vn(d) inlige alz laiste vn(d) inlige recht vn(d) gewendleich ist, W(er) au(ch) daz daz vir czehen tag aus chieme(n) vnd
daz inlege(n) wurd gelast od(er) nicht gelast vnd daz di vorgeschribe(n) demnach daz vorgenat gut cze Paratucz dem ofegenante(n) Benesse od(er) seine(n)
erbe(n) nicht mochte(n) vrein alz lant recht ist So schol dar nach cze hant d(er) ofegenat Beness vo(n) Paratucz vn(d) sein Hausvroue od(er) sein erbe(n) an
vorgenat gut di Vir vnd czwainczig m(a)r(c)k g(u)tt(er) p(ra)g(er) phenneg merherisch(er) gewichtes nemen vnd entlehen cze den ch(ri)sten oder
cze de(n) Juden auf all vns(er)n schade(n) vnd auf all vns(er)n gut ez sey vand od(er) vn vand Vnd welch(er) aus de(n) vorgeschribe(n) daz selb inleger
laist cze Budywa(n) d(er) gelubt daz bei sein(er) treun daz er auf sein recht nicht schol aus reite(n) noch aus dem selben inlege(n) nyndert chomen
cze Budywa(n) also lang ez wert ee Jnicht der ofegenat Beness vo(n) Paratucz vnd sein Hausvrou(e) vn(d) sein erben haupgut vn(d) schaden den
er mag beweisen bey sein(er) treun daz er des selben gutes schaden hab genumen Jn welch(er) sach czeugnuss vnd daz der chauf gancz
vnd stet beleybe geb wir vorgenante(n) Wilhalm von Nikelwicz Holacz vo(n) Nikelwicz vnd Jeschk Steinssecz disen offe(n) p(ri)f mit
vns(er)n hanginde(n) jngesigeln Dar ub(er) hab wir ofegenante(n) cze vns gebeten di edlen leut Bribozn von Lytwan vnd Nicklan
vo(n) Stitnicz seine(n) brud(er) Albrechten vo(n) Boczicz vnd Mstisloen auch vo(n) Lytwan mit cze ainer czeugnuss dises chaufes vnd auch ir
jngesigel henge(n) an disen p(ri)f cze ain(er) czeugnuss diss sache Gegeben vnd geschehen in dem m(a)r(c)kt cze Budywan Nach c(ri)stus
gepurd in dem Dreuczehenhundert vnd in dem Drey vnd vumfczigiste(n) Jar An sand Wenczeslabs tag alz er d(er) habe
wart in der vasten