Ich lwcz von lulcz gesessen czu dirchlossi vnd Ich margaretha sein eleichew hawsfraw vnd all vnser gerbn veriehen vnd thun kund offenlich an
disem priff allen lewten dy yn sehent od(e)r horent lesen das wir mit wol vordachtem mut vnd mit raet aller vnser frewnt czu der czeit da wir
es wol gethun mochten vorthawft haben vnd vorkawfen mit disem priff czway freye lehen in dem dorff czu behmischen paranitz czu dorff
vnd czu veld mit allen nuczen mit allem rechtem vnd mit voller ganczer herschaft als wir se gehabt haben vnd vns vor won dar yn vns
chayn recht nichtz czu bhalden vmb czwo vnd czwainczik mark gross silbrem pfennig prager mwncz vnd merherisch czal dem Erwirdigen
vnd geistlichen herren herren Zacharien czu den czeitn Apt des closters czu pruk vnd dem ganczen conuent czu der mwnczen des obgen(anten) clo-
sters czu pruk vnd dy selbn czway lehn dy gelub Ich vorgenant(e)r lucz meyn hawsfraw vnd vns(er) gerbn fur vns vnd mit vns geluben
der manhaft ritt(e)r her Eowest von der weyten mul vnd Andies von Zesang czu ffreyn czu schirmen vnd aus czu richten von aller anspruch
es sey von geystlichen lewten od(e)r von wertlichen von Judn od(e)r von christen vnd sunderlich wir dy morgengab der egenanten ffrawen mar-
garethn Als lancz recht ist vnd gewonhait czu merhern vnd czu dem nechsten lanczgesprech in dy lancztafel ein czu legen wenn di lancz
tafel offen sein wirt wo wier des nicht entreten welich czwen dann vnd(e)r vns obgeschribn von dem vorgenant(e)n herren Apt od(e)r von dem
conuent od(e)r vem se es beuelhn gemant wurden dy schullen yeclicher mit aim knecht vnd mit czwain pfertn gen cznoym in dy stat
in eins erbn manes gasthaus ein reitten vnd da yn ligen vnd laisten als yn ligens recht ist in dem lant czu merhern vnd nicht aussko(m)-
men als lang es wird dann den egenanten herren dem Apt vnd dem conuent dy vor gesprochen czway lehen mit aller czu gehorung
vor aller maniglich geschyrmt vnd gefreyet vnd in dy lancztafel gelegt als oben benent ist wardn Auch es wird gelaist od(e)r nicht ge
laist ob(e)r virczehen tag nach der monug so haben dy oft genanten herren hawpgut czwo vnd czwainczik mark gross vnd all schaden
dy see nemud sein mit potschaft mit raisen mit zerung dy see yedlich mochten beweisen czu nemen auf vns(er) schaden czu Judn od(e)r
czu cristen auf all vns(er) gut(e)r se sein varnd od(e)r vnvarnd dy wir nw haben od(e)r her nach habund werden Jnnerlancz od(e)r ausserlancz
an alle wid(e)r red das awr dise sach also in yir schikkung stat vnd vngebrochen beleib des geb wier yn disen priff vorsigeltn mit vns(er)
aller anhanginden aigen Jnsigeln nach christ gepurd drewczehen hundart Jar vnd dar nach in dem virden vnd achczigsten Jare des
nechsten ffreitags nach sand michele tag